Ամբաստանյալների պաշտպաններից մեկի դիմումի հիմքով (դեռեւս 2017թ. նախապես նշանակված նիստի մասնակցելու պատճառով) այսօր հետաձգվեց քրեական աշխարհում հեղինակություն համարվող Արա Վարդանյանի (մահացել է 2017թ.)՝ «Ճվճվ Արո»-ի որդու՝ Սերժ Վարդանյանի եւ Ռոբերտ Հայրապետյանի գործով հերթական դատական նիստը (դատաքննությունն արդեն 4-րդ տարին է ընթանում):
Հիշեցնենք, որ ամբաստանյալներ Սերժ Վարդանյանն ու Ռոբերտ Հայրապետյանը, որը դատարանում հերքում է իր եւ Վարդանյանի ընկերական կապը, մեղադրվում են հասարակական կարգը խախտելու եւ իրանահայ Շանթ Մարգարյանի հանդեպ բռնություն գործադրելու մեջ:
Տուժած իրանահայ Շանթ Մարգարյանն այսօր տեղեկանալով, որ նիստը կրկին հետաձգվում է, դժգոհեց դատական համակարգից: Լրագրողներին նա հայտնեց՝ դիմում է գրելու, որ այլեւս չի պատրաստվում դատարան ներկայանալ:
«Ես Իրանի եւ ԱՄՆ-ի քաղաքացի եմ: Եթե հարկ լինի, տեղի դեսպանատներում կգանգատվեմ, որ օտարերկրացիներին չեն հարգում: Կասեմ, որ իմ հանգիստը խախտում են: Այս գործընթացն այնքան երկարեց, որ «խաղերի» մեջ ընկա,-նշեց իրանահայը՝ կարծիք հայտնելով, որ ամբաստանյալները լավ կապեր ու ծանոթություններ ունեն:
Շանթ Մարգարյանի խոսքով՝ վարույթն իրականացնող մարմինը վաղուց «մոռացել» էր իր գոյության մասին, միայն «Ճվճվ Արո»-ի մյուս որդու մասնակցությամբ վթարից հետո(ամիսներ առաջ, երբ պատահարից երկու ոստիկան մահացավ), երբ ինքը հատեց Հայաստանի սահմանը, իրեն ծանուցեցին այս գործով:
«Եթե ոստիկանների դեպքը չլիներ, ինձ չէին կանչի, որովհետեւ ես վաղուց թուղթ էի գրել, որ վերջ՝ հրաժարվում եմ իմ դիմումից: Եթե դատը չշարունակվեց, թողնելու եմ՝ գնամ, ինչ ուզում են՝ անեն: Ինձ ասում են՝ պարտավոր եմ ներկայանալ»,-տեղեկացրեց Շանթ Մարգարյանը:
Լուիզա ՍՈՒՔԻԱՍՅԱՆ
Aravot.am–ը տուժածի՝ դատական գործընթացի եւ ամբաստանյալներ Վարդանյանի ու Հայրապետյանի մասին դժգոհությունների առնչությամբ վերջիններիս փաստաբանների կարծիքին կանդրադառնա առաջիկա հրապարակումներում
Յարգելիս, մի՛ նեղուիր: Սա Հայաստանն է, որտեղ արդարադատութիւնը ծաղրուծանակ է:
Կը գնաս, բա ի՜նչ կ’անես 🙂