«Ռուսաստանի եւ Ադրբեջանի միջեւ մինչ օրս իրագործվող սպառազինության մատակարարման պայմանագրերը կնքվել են դեռեւս 2010-2011թթ.-ին: Դա նշանակում է, որ 2016-2017թթ.-ին այդ պայմանագրերը մոտենում են ավարտին: Այսինքն՝ Ռուսաստանը ոչ թե կրճատում է զենքի մատակարարումն Ադրբեջանին, ինչպես վերջերս հայտարարեցին ռուս պաշտոնյաները, այլ պարզապես պայմանագրերի կատարումն է ավարտվում»,- «Առավոտ»-ի հետ զրույցում ասում է Razm.info մասնագիտացված կայքի փորձագետ, վերլուծաբան Տարոն Հովհաննիսյանը:
Նրա բնորոշմամբ՝ Ռուսաստանի նման երկրները, որոնք մեր տարածաշրջանում ունեն ազդեցություն եւ պատասխանատվություն, զգույշ պետք է մոտենան Ադրբեջանի նման ագրեսիվ քաղաքականությամբ պետություններին զինատեսակներ մատակարարելու հարցին. «Ադրբեջանը միշտ խնդիր է ունեցել, օրինակ, թուրքմեն ժողովրդի եւ Իրանի հետ, իսկ ապագայում այլ խնդիրները եւս բացառված չեն: Ուստի պարզ չէ, թե այդ սպառազինության սլաքները որ կողմ կուղղվեն: Ադրբեջանն այս պահին սերտ գործակցում է Թուրքիայի հետ»:
ԼՈՒԻԶԱ ՍՈՒՔԻԱՍՅԱՆ
«Առավոտ»
12.04.2018
