Արդեն առիթ ունեցել ենք նշել, որ Հայաստանում արված ներդրումների մասով ՀՀ Վարչապետի և ՀՀ Տնտեսական զարգացման և ներդրումների նախարարի ներկայացրած թվերի միջև կա մեկ միլիարդ դոլարից ավելի տարբերություն: Ի դեպ, մեր հարցադրմանն այդպես էլ պարզաբանում չտրվեց:
Մեզ հետաքրքրում է մեկ այլ ցուցանիշ, որն արդյունք է արված ներդրումների: Դա աշխատատեղերի քանակն է:
ՀՀ ԱՎԾ-ն հայտնել է որ 2017 թ. տվյալներով գործազուրկների քանակը կազմել է 218.9 հազար մարդ: Դրա նախորդ տարում՝ 2016թ. այդ ցուցանիշը կազմել է 220.2 հազար մարդ:
Այսինքն՝ գործազրկությունը նվազել է 1300 մարդով: Հետաքրքրական է այն փաստը, որ այս թիվը համընկնում է ՀՀ ազգաբնակչության նվազման թվաքանակի հետ: Ըստ ԱՎԾ-ի, Հայաստանի մշտական բնակչության թիվը, 2016 թվականին արձանագրված ցուցանիշի համեմատ, նվազել է 1300-ով:
Այլ խոսքով՝ գործազրկությունը նվազել է բնակչության թվի նվազման հաշվին:
Եթե հաշվի առնենք այն հանգամանքը, որ ՀՀ ԱՎԾ պաշտոնական տվյալներով 2017-ին Հայաստանից հեռացել և այլևս չի վերադարձել ավելի քան 37,5 հազար քաղաքացի, ապա պետք է եզրակացնել, որ գործազրկությունը ոչ թե կրճատվել, այլ ավելացել է կամ որ նույնն է՝ խոստացած աշխատատեղերը չեն ստեղծվել:
Այդ դեպքում ինչպես կարելի է մեկնաբանել ՀՀ Տնտեսական զարգացման և ներդրումների նախարարի պաշտոնակատարի կողմից ՀՀ Ազգային Ժողովում արված այն հայտարարությունը, որ անցյալ տարի Հայաստանում 5700 նոր աշխատատեղ է ստեղծվել:
Թաթուլ Մանասերյան
