Ադրբեջանում այսօր ընթացող նախագահական ընտրություններում նկատվել են որոշակի խախտումներ, չնայած ադրբեջանական ԶԼՄ-ների մեծ մասը լռում են այդ մասին:
Դեմոկրատական կուսակցությունից նախագահի թեկնածու Սարդար Ջալալօղլուի կենտրոնական ընտրական շտաբի նախագահ Թալիաթ Ալիևը Turan գործակալությանն ասել է, որ «ընտրությունների ավանդական կեղծումները շարունակվել են նաև այս նախագահական ընտրությունների ժամանակ»:
«Կարուսել գործողությունը», տարբեր ընտրատեղամասերում մեկ մարդու բազմակի քվեարկությունները, ընտրատեղամասերում դիտորդների մուտքն արգելելը և այլ խախտումներ տեղի են ունենում նաև այսօր»,- ասել է Ալիևը:
Նա օրինակ է բերել այն փաստը, որ ընտրատեղամասերից մեկում ընտրական հանձնաժողովի անդամները թույլ չեն տալիս դիտորդներին մուտք գործել ընտրատեղամասեր՝ պատճառաբանելով, որ շրջանային ընտրական հանձնաժողովի թույլտվություն չկա: Ու դա չնայած այն փաստին, որ նրանք ԿԸՀ-ի կողմից հավատարմագրեր ունեն:
Ալիևը նաև նշել է, որ ընտրողների ակտիվությունը շատ ցածր է, կան այնպիսի ընտրատեղամասեր, որտեղ քվեարկել է ընդամենը 4-5 մարդ:
Պատրաստեց՝ Վիկտորյա ԱՆԴՐԵԱՍՅԱՆԸ
