Ականների վտանգի իրազեկման եւ հակաականային գործունեությանն աջակցելու միջազգային օրվան նվիրված մասնագիտական սեմինարի ընթացքում այսօր ԵՊՀ-ում ՄԱԿ-ի զարգացման ծրագրի հայաստանյան գրասենյակի ժողովրդավարական կառավարման ծրագրի ղեկավար Ալլա Բակունցը զավեշտալի դեպք պատմեց: Նա նշեց, որ վերջերս «Հումանիտար ականազերծման եւ փորձագիտական կենտրոն» ՊՈԱԿ-ի մասնագետների հետ այցելել են Սեւանի շրջանի որոշ գյուղեր, որոնցից մեկից ականապատված տարածքի մասին ահազանգ են ստացել:
«Սահմանային գյուղերից մեկում ռիսկային տարածքներ կան: Տեղացիներից մեկը ասաց, որ մեզ կուղեկցի: Ճանապարհի մի մասն անցանք մեքենայով, մյուսը՝ ոտքով: Բլրի վրա բարձրացանք, դիմացը դաշտ էր: Այդ տղան ասաց, որ տեղում սպասենք, ապա ծառերի արանքում անհետացավ…հետ եկավ չպայթած ականը երեխայի պես գրկած ու ասաց՝ «քուր ջա՜ն, էն որ ասում էի՝ էս ա»…»,-պատմեց Ալլա Բակունցը:
Նրա փոխանցմամբ՝ փորձագետները երիտասարդի անմիջականությունից սկզբում շփոթվել են. «Այդ տղան, սակայն, ասաց՝ «տենո՞ւմ ես ոտերը՝ իմ ձեռով եմ երկու օր առաջ քանդել, մի վախի»:
Այս օրինակն Ալլա Բակունցը մեջբերեց՝ ընդգծելու համար, թե որքան կարեւոր է իրազեկման մակարդակի բարձրացումը ՀՀ սահմանային գոտիների բնակիչների համար: Ի դեպ, ականի կամ այլ լքված զինամթերքի հանդիպելիս պետք է անմիջապես ահազանգել ԱԻՆ կամ ոստիկանություն, կամ դիմել 08000-9000 թեժ գծի օգնությանը:
Լուիզա ՍՈՒՔԻԱՍՅԱՆ
Լուսանկարում՝ չպայթած եւ վնասազերծված ականներ
