ԵՄ անդամ երկրներում ՀՀ ԵՄ համաձայնագիրը վավերացման գործընթացում է: Այդ մասին խորհրդարանում լրագրողների հետ զրույցում ասաց ՀՀ ԱԳ փոխնախարար Կարեն Նազարյանը՝ հավելելով, որ տարբեր եվրոպական մայրաքաղաքներից շուտով տեղեկություններ կստացվեն:
ՀՀ խորհրդարանն այսօր միաձայն վավերացրեց ԵՄ-ի հետ համաձայնագիրը: Հիշեցնենք նաեւ, որ ՀՀ-ԵՄ համաձայնագիրն առաջինը վավերացրել էր Էստոնիան, օրերս այն առաջին ընթերցմամբ ընդունեց նաեւ Լատվիայի խորհրդարանը:
Երեկ քննարկումների ժամանակ պատգամավորները մտահոգություններ հնչեցրեցին առ այն, որ համաձայնագրի դրույթների իրականացման համար քաղաքական կամք է անհրաժեշտ եւ կասկածներ հայտնեցին, որ իշխանությունն ունի այդ կամքը: Կարեն Նազարյանը կարծում է, որ «այդ առումով քաղաքական կամքի դեֆիցիտ չի լինի» Հայաստանում:
Պատգամավորներն ասացին նաեւ, որ Արցախի հակամարտությանը վերաբերող բանաձեւը Հայաստանին լավություն չէ: Լրագրողները փոխնախարարից հետաքրքրվեցին՝ չկա՞ մտավախություն, որ հակամարտության մասին ձեւակերպումները կարող են փոփոխվել: Փոխնախարարն ասաց՝ աշխատում են, որ այդ ամրագրված դրույթները փոփոխությունների չենթարկվեն. «Համաձայնագիրը պարտադիր իրավական ուժ ունի կողմերի համար։ Համաձայնագրում ԼՂ հակամարտության վերաբերյալ կողմերի հանձնառությունը հստակ է ամրագրված։ Մեծապես հույս ունեմ, որ այդ առումով ԵՄ կողմից շեղումներ չեն լինի»:
Նելլի ԳՐԻԳՈՐՅԱՆ
