Արցախյան հակամարտության հարցում առաջիկայում փոփոխություններ ակնկալել պետք չէ. նախադրյալներ չկան: «Հայացք» մամուլի ակումբում այսօր նման կարծիք հայտնեց քաղաքագետ Ալեքսանդր Իսկանդարյանը: «Առաջիկայում Ադրբեջանը բանակցային գործընթացը կհամադրի շփման գծում իրավիճակի պարբերական սրումներով: Դա իրենց ընդունած երկարաժամկետ քաղաքականությունն է»,-համոզմունք հայտնեց քաղաքագետը:
Նրա խոսքով՝ սահմանին Ադրբեջանի կողմից ավելի մեծ ծավալի էսկալացիաները բացառված չեն: Նախիջեւանի հատվածից վտանգի վերաբերյալ էլ քաղաքագետը նշեց. «Լայնածավալ ռազմական գործողությունների վտանգ չկա, բայց սրացումներն արցախա-ադրբեջանական սահմանին, կրկնում եմ, բացառված չեն»:
Ինչ վերաբերում է Թուրքիայի՝ ռուսական կողմից S-400 զենիթահրթիռային ՀՕՊ համակարգերի ձեռքբերմանը, քաղաքագետը դա թուրքական «PR փուչիկ» է որակում, որն Արցախի խնդրին չի վերաբերում. «Թուրքիան դա անում է ՆԱՏՕ-ից դուրս իր հնարավորություններն ի ցույց դնելու համար»:
Լուիզա ՍՈՒՔԻԱՍՅԱՆ
