«Կեցցե ազատության ջահը, որ վառվել է քիչ առաջ ՀՀ ԱԺ ամբիոնից». Նիկոլ Փաշինյանը հորդորեց մասնակցել ՀՀԿ գրասենյակի մոտ անցկացվելիք պիկետին

Քիչ առաջ ֆեյսբուքյան ուղիղ եթերից ԵԼՔ խմբակցության ղեկավար Նիկոլ Փաշինյանը հորդորեց Երևանում գտնվող իրենց աջակիցների մասնակցել այսօր 19.30-ին Երևանի մետրոպոլիտենի Զորավար Անդրանիկ կայարանի մերձակայքից՝ Սուրբ Գրիգոր Լուսավորիչի մոտից դեպի ՀՀԿ գրասենյակ իրականացվող քայլարշավին և ՀՀԿ գրասենյակի մոտ տեղի ունենալիք պիկետին: Պարոն Փաշինյանը, ըստ երևույթին տեղյակ չլինելով, որ ՀՀԿ-ն ԳՄ նիստի ժամը փոխել է՝ 18.30-ին, հայտարարեց. «Երեկոյան 20.00-ին ՀՀԿ գրասենյակում տեղի է ունենալու նիստ, որում մեր տեղեկություններով՝ նախնական քննարկում է տեղի ունենալու վարչապետի թեկնածուի վերաբերյալ, թեև պարզ է, որ Սերժ Սարգսյանն է թեկնածուն: «Մերժիր Սերժին», «Իմ քայլը» նախաձեռնությունները «Քաղաքացիական պայմանագրի» հետ նախաձեռնել են քայլարշավ: Դրան միանալու համար պետք է 19.20-ին լինել մետրոյի Զորավար Անդրանիկ կայարանի մերձակայքում՝ «Սուրբ Գրիգոր Լուսավորիչ» եկեղեցու տարածքում, որտեղից էլ քայլարշավի մասնակիցները շարժվելու են դեպի ՀՀԿ գրասենյակ»:

Նշենք, որ դրանից առաջ ԵԼՔ-ի կողմնակիցները կատարեցին հարսանեկան արարողություն: Նրանք քայլարշավի մասնակիցներին դիմավորեցին մի մեքենայով, որի վրա փակցված էին սահմանին ունեցած զոհերի և արտաքին պարտքի մասին ցուցանակներ, այնուհետև դիմավորեցին չեբուրաշկայով, իսկ վերջում Սերժ Սարգսյանի լուսանկարը փուչիկներով բաց թողեցին երկինք:

Անդրադառնալով ԵԼՔ խմբակցության պատգամավորներ Արարատ Միրզոյանի և Լենա Նազարյանի նախաձեռնությանը՝ պարոն Փաշինյանն ասաց՝ նրանք ՀՀ ԱԺ ամբիոնից վառեցին ազատության խորհրդանշանակ ջահը: Ըստ նրա ՝ այս նախաձեռնությամբ իրենք ի ցույց են դնում իրենց վճռականությունը Սերժ Սարգսյանի երրորդ ժամկետի դեմ պայքարում: Պարոն Փաշինյանը ամփոփեց. «Կեցցե ազատության ջահը, որ վառվել է քիչ առաջ ՀՀ ԱԺ ամբիոնից»:

Իսկ մոտ մեկ ժամ առաջ Հրազդանում Նիկոլ Փաշինյանը տնկեց «երջանիկ Հայաստանի» ծառը: Նրա տեղեկացմամբ՝ «Իմ քայլը» նախաձեռնության անդամները գիշերն անցկացրել են Հրազդանում՝ Սասուն Միքայելյանի շտաբի բակում: Նաև նշեց, որ Հրազդանից շարժում են դեպի Երևան՝ Ազատության հրապարակ, ուր հասնելու են ապրիլի 13-ին՝ ժամը 18.30-ին, իսկ ապրիլի 13-ին, ժամը 13:00-ին լինելու են Երևանի հյուսիսային ավտոկայանի դիմաց, որտեղ և կան քաղաքացիներ, որոնք ցանկություն ունեն գալ ու դիմավորել Երևանի մուտքի մոտ, որոնց բոլորին հաճույքով սպասում են:

Տաթև ՀԱՐՈՒԹՅՈՒՆՅԱՆ