Մաշտոց-Գրիգոր Լուսավորիչ խաչմերուկի գետնանցումում տեղի ունեցած հրդեհից անցել է մեկ ամիս, սակայն ո՛չ տարածքն է մաքրվել, ո՛չ էլ հրդեհի թողած հետեւանքներն են գոնե որոշ չափով վերացվել: Սա մայրաքաղաքի ամենաբանուկ գետնանցումներից է. քաղաքացիներն ամեն անգամ այստեղով անցնելիս տհաճ զգացողություն են ունենում. գետնանցումի մշտական գարշահոտին միացել է նաեւ այրվածի ծխահոտը:
Տեսարանը նույնպես աչքին տհաճ է, մթին` նույնիսկ վախենալի: Խորհրդային տարիներին այստեղ «Չինար» հանրախանութն է գործել։ Տարածքն այսօր էլ տեր ունի, սակայն, ինչպես պարբերաբար Երեւանի քաղաքապետարանի պաշտոնյաներն են ասում` սեփականատերերը պատշաճ կերպով չեն կատարում իրենց պարտավորությունները: Տարածքի բնակիչները հրդեհի պատճառը հենց այդ բարձիթողի վիճակով էլ պայմանավորում են` նշելով, որ գետնանցումը հաճախ է անտուններին «հյուրընկալում», որոնք տաքանալու համար այստեղ կրակ են վառում: Գետնանցումի սեփականատերերին օրենքի դաշտ բերելու գործը նույնպես քաղաքապետարանի լիազորությունների մեջ է մտնում, սակայն այդ ուղղությամբ այս գետնանցումում գործնական քայլեր չեն նկատվում: Եթե չեն կարողանում սեփականատերերին ստիպել, որպեսզի պարտավորությունները կատարեն, ապա գոնե այրված տարածքը պաստառապատեն:
Լուսանկարները` ԼՈՒՍԻՆԵ ԲՈՒԴԱՂՅԱՆԻ
«Առավոտ»
10.04.2018
