Բջջային սարքերը «հաղթել» են համակարգիչներին դեռևս 2014 թվականին: Այսօր «Սպուտնիկ-Արմենիա» ակումբում նման կարծիք հայտնեց ռուս լրագրող, մեդիամենեջեր Նատալյա Լոսեւան: Նա այսօր SputnikPro շարքի դասընթացի ընթացքում հայ լրագրողներին ներկայացրեց ժամանակակից մուլտիմեդիոն տեղեկատվական գործակալության աշխատանքի ստանդարտներն ու տեխնոլոգիաները։
Ըստ նրա՝ ժամանակակից աշխարհում բջջային հեռախոսը տեղեկություն ստանալու հիմնական գործիքն է. «Գնալով այդ միտումը միայն աճում է։ 2023 թվականին աշխարհի ընկերությունների մեծ մասի աշխատակիցների 45%–ը բջջային հեռախոսը կօգտագործի որպես աշխատանքի հիմնական գործիք։ Դրանք կլինեն բանկի աշխատակիցները, բժիշկները ու այլ ոլորտների ներկայացուցիչները… Այսօր սմարթֆոնի օգտատերն օրվա ընթացքում միջինը 50 անգամ նայում է էկրանին: Բայց հետաքրքիրն այն է, որ սմարթֆոնների թվի աճի հետ մեկտեղ 2023 թվականի համար կանխատեսվող աճն այդքան նշանավոր չէ։ Մարդու շփումը բջջային հեռախոսի հետ չի գերազանցի 65 անգամը»:
Անդրադառնալով մեդիայում ապատեղեկատվության տարածման խնդրին՝ փորձագետը նկատեց, որ ապատեղեկատվությունը շարունակում է թրենդային մնալ, քանի որ այն ավելի հաճախ է քննարկվում։
Բանախոսը նաեւ նկատեց, որ պատահական չէ, որ պաշտոնական վիճակագրության համաձայն հայկական լրատվամիջոցները կախվածություն ունեն սոցիալական կայքերից, ամբողջ աշխարհում մարդիկ նախընտրում են ստանալ նորություններ հենց սոցիալական կայքերից:
Արփինե ՍԻՄՈՆՅԱՆ
