«Ելք» խմբակցության պատգամավոր Էդմոն Մարուքյանը, ԱԺ-ում ԵՄ համաձայնագրի քննարկման ժամանակ լսելով ՀՀԿ-ականների ելույթները, որ մենք հաջողացրել ենք «եւ-եւ»-ի քաղաքականությունը վարել, ասաց, որ Հայաստանը չի տանում երկու ինտեգրացիոն գործընթաց. «Նման բան չկա, ինտեգրացիոն գործընթաց տարվել է միայն ԵԱՏՄ-ի հետ կապված: ՀՀ-ն պետք է թարմացնի ԵՄ-ի հետ իր հնացած պայմանագիրը, որը արել է: Այո, մենք ունեցել ենք շանս ավելին ստանալու, մենք այդ շանսից զրկվել ենք»:
Անդրադառնալով ԵԱՏՄ-ին՝ Մարուքյանն ահազանգեց՝ դիմելով կառավարությանը. «Հենց հիմա եւ երեկվանից սկսած՝ Ռուսաստանի տարբեր քաղաքներում հայ վարորդներին ոստիկանությունը նեղն է գցում՝ ասելով, որ դուք պետք է վարորդական իրավունք հանեք: Բազմաթիվ մարդիկ մեզ զանգում են, բողոքում են: Կառավարությանը հորդորում եմ, որ զբաղվի այս հարցով: Զբաղվել էր, իբր թե լուծվել էր, բայց չի լուծվել»:
Մարուքյանը, խոսելով ԵՄ համաձայնագրի մասին՝ ասաց, որ ՀՀ իշխանությունները երկու բան են նայելով աշխարհին՝ ասում, առաջինը, որ խորհրդարանական կառավարման են գնացել, ինչը սուտ է, երկրորդը՝ մենք ստորագրել ենք այս համաձայնագիրը:
Նա ասաց, որ առաջինը եթե սուտ էր, իրենք ամեն ինչ անելու են, որ երկրորդը սուտ չդառնա եւ այս համաձայնագիրը կյանքի կոչվի: «Ելք» դաշինքը մոնիտորինգ է անելու, թե համաձայնագիրն ինչքանով է ի կատար ածվում:
Հռիփսիմե ՋԵԲԵՋՅԱՆ
