ՀՀԿ խմբակցության անդամ Արտաշես Գեղամյանը մանրամասն ընթերցել է ադրբեջանական մամուլի արձագանքն այն հանգամանքին, որ ՀՀ-ն, լինելով միաժամանակ ԵԱՏՄ անդամ, նաեւ ԵՄ համաձայնագիրն է նախաստորագրել ԵՄ-ի հետ, որն առաջիկայում վավերացվելու է: Խորհրդարանում ԵՄ համաձայնագրի քննարկման ժամանակ նա ասաց. «Հիմնական մեղադրանքը կայանում էր այնտեղ, թե ՀՀ-ին կհաջողվի՞ միաժամանակ նստել երկու աթոռների վրա, Հայաստանը կդավաճանի իր ռազմաքաղաքական գործընկերոջը կամ կդավաճանի ԵՄ-ին ու չի հետեւի այս համաձայնագրին: Խուճապ է առաջացրել այս իրողությունը մեր հարեւանների մոտ ու իրենք չեն էլ կարողանում թաքցնել»:
Գեղամյանն ասաց, որ Սերժ Սարգսյանը դեռ վաղուց էր ասում, որ «կամ-կամ»-ը մեզ համար ընդունելի չէ եւ այն, որ Հայաստանին հաջողվեց «եւ-եւ»-ը մեծ դժգոհություն է առաջացրել ադրբեջանա-թուրքական լոբբինգի մոտ:
Հերմինե Նաղդալյանն էլ Սերժ Սարգսյանի գլխավորությամբ սկսեց շնորհակալություն հայտնել այն մարդկանց, որոնք հաջողացրել են այս փաստաթուղթը. «Սա պատմական փաստաթուղթ է թե՛ մեզ համար, թե՛ ԵՄ-ի համար»:
Իսկ ԱԺ փոխխոսնակ Էդուարդ Շարմազանովն իր ելույթում ասաց, որ ՀՀ-ում ժողովրդավարական արժեքներն անշրջելի են եւ այստեղ ԵՄ-ի աջակցությունը անհրաժեշտություն է: Նա ասաց, որ այս համաձայնագրով օրենքի ուժ է ստանալու Արցախի ժողովրդի ինքնորոշման իրավունքը: Այլեւս որեւէ մեկը չի կարող խախտել այդ դրույթը. «27 անդամ երկրները եւ ԵՄ-ն, վավերացնելով այս համաձայնագիրը ՝ ընդունելու են դա՝ Արցախի ժողովրդի ինքնորոշման եւ իրավահավասարության սկզբունքը. «Ինձ համար սա այս փաստաթղթում ամենակարեւորն է»:
Շարմազանովն ասաց, որ ԵՄ-ի հետ համաձայնագիրը վավերացնելով՝ ԵԱՏՄ-ին ու ՀԱՊԿ-ին չենք հակադրվելու. «ՀՀ-ն ՌԴ-ի հետ ունի դաշնակցային հարաբերություններ, ԵԱՏՄ անդամ է, ՀԱՊԿ անդամ է եւ հարաբերությունների մակարդակն այս կառույցներում դաշնակցային են: ԵՄ-ի հետ մենք իրականացնում ենք գործընկերային հարաբերություններ: Եվ խոսել արտաքին քաղաքական կուրսի փոփոխության մասին նոնսենս է: Հայաստանը շարունակելու է զարգացնել իր դաշնակցային հարաբերությունը ՌԴ-ի հետ՝ միեւնույն ժամանակ խորացնելով իր գործընկերային հարաբերությունները, երկխոսությունը ԵՄ-ի հետ»:
Հռիփսիմե ՋԵԲԵՋՅԱՆ
