«Մերժիր Սերժին» նախաձեռնության անդամ Դավիթ Սանասարյանը արձանագրել է, որ երեկվա իրենց ցույցին սպասվածից ավելի շատ քաղաքացիներ են եկել:
«Սպասվածից ավելի հաջող է ստացվել՝ կապված քաղաքացիների արձագանքով, մասնակցությամբ:
Մեզ են մոտեցել շատ քաղաքացիներ, կոնտակտներ են փոխանցել, ասել ենք՝ ոնց հետեւեն մեր գործողություններին, խնդրել են մասնակից դառնալ մեր նախաձեռնությանը: Կային որոշակի թերություններ, որոնք երեկ ամփոփել ենք, հասկացել ենք ու դասեր քաղել: Նախորդ ակցիայից մի քանի անգամ ավելի շատ մարդ կար, մեր շարքերը համալրվում են: Քաղաքացին շատ զգայուն է եւ եթե տեսնում է վճռականություն, իր մոտ էլ է վճռականություն առաջանում, երեկ այդ իմպուլսը զգացել ենք ու առաջիկայում ավելի լայնամասշտաբ ու կոնկրետ գործողություններ կիրականացնենք»,- այսօր «Նոյան տապան» ակումբում ասաց Դավիթ Սանասարյանը:
Ըստ նրա՝ իրենց երեկվա ցույցին մասնակցել է 800-1000 քաղաքացի ու հյուր է եղել նաեւ «չեբուրաշկան», օդ են բաց թողել գաղջ մթնոլորտն արտացոլող փուչիկներ:
Նախաձեռնության անդամ Արեն Մկրտչյանի խոսքով, իրենց հետագա գործողությունների վերաբերյալ ծրագիրը տարբերվում է «Քաղաքացիական պայմանագրի» ծրագրից, թեեւ համագործակցում են միմյանց հետ. «Ամենայն հավանականությամբ, եւս մի հավաք կլինի, կհստակեցնենք, որ առաջ շարժվենք, որեւէ ուժ, թիմ չի կորցնելու իր դեմքը, մենք չենք ձուլվելու: Թե՛ հանուն Հայաստանի պետության ճակատը, թե՛ «Քաղաքացիական պայմանագիրը , թե՛ «մերժի՛ր Սերժին» նախաձեռնությունն իր դեմքը պահելու է»:
Դավիթ Սանասարյանն էլ հավելեց, որ իրենք հանդիպում են թե «Քաղաքացիական պայմանագրի» անդամների, թե «հանուն Հայաստանի պետության ճակատի» անդամների հետ. «Կան փոխըմբռնումներ ու ընդհանուր պատկերացումներ, ամսի 13-ին միասնական կորոշենք՝ ինչպես ենք շարունակում պայքարը… իշխանական այն քարոզը, որ ընդդիմությունն աղճատված է, իրականությանը չի համապատասխանում, գոնե այն հասունությունն ու լայնախոհությունը, որ քաղաքացիներն ակնկալում են, կան երեք ուժերի մեջ էլ»:
Արփինե ՍԻՄՈՆՅԱՆ
