Aravot.am-ի տեղեկություններով, Կոնդի Սուրբ Հովհաննես եկեղեցու հարեւանությամբ գտնվող հին Երեւանի շենքերից մեկի քարերը գողացվել են: Ընդ որում` այն պետք է վերականգնվեր «Երեւան իմ սեր» հիմնադրամի կողմից:
Հիմնադրամի տնօրեն Արշակ Կարապետյանը սկզբում չցանկացավ որեւէ մեկնաբանություն անել, ասաց, որ անհարմար տեղում է եւ կպատասխանի մեր հարցերին մի քանի օրից: Երբ պնդեցինք, որ թեկուզ հերքի կամ հաստատի, իսկապե՞ս գողացվել են վերականգնվող հին երեւանյան շենքի քարերը, Aravot.am-ի հետ զրույցում նա նշեց, որ առաջին անգամ է նման բան լսում: «Գողացե՞լ են այն շենքի քարերը, որը հիմա մենք կառուցում ենք: Եթե ձեզ հետաքրքիր է, մի քիչ ավելի մանրամասն մի քանի օր հետո կխոսենք»,-ասաց նա
Հիշեցնենք, որ 2013 թ. հունվարին կառավարության որոշմամբ Կոնդի Սուրբ Հովհաննես եկեղեցու հարակից տարածքում 1005 քառակուսի մետր մակերեսով, 401 միլիոն դրամ արժեք ունեցող հողամասը նվիրաբերվել է «Երեւան իմ սեր» հիմնադրամին, որի ծրագրերից մեկը Երեւանի կենտրոնում ապամոնտաժված հին շենքների քարերով շենք-շինությունների կառուցումն է Կոնդում: Հիմնադրամի հոգաբարձուների խորհրդի անդամների թվում է նաեւ ՀՀ նորընտիր նախագահ Արմեն Սարգսյանը:
Գոհար ՀԱԿՈԲՅԱՆ
Արշակ Կարապետյանի լուսանկարը` նրա ֆեյսբուքյան էջից:
