Ռուսաստանն առանցքային դեր ունի Արցախյան կարգավորման հարցում: Այս մասին հայտարարել է Հայաստանի նորընտիր նախագահ Արմեն Սարգսյանը ռուսական ՏԱՍՍ գործակալության հետ զրույցում:
«Արդեն ավելի քան 25 տարի կարգավորման բանակցությունները տարվում են ԵԱՀԿ Մինսկի խմբի ձևաչափով՝ համանախագահ երկրների՝ Ռուսաստանի, ԱՄՆ-ի ու Ֆրանսիայի առաջարկած կարգավորման սկզբունքների ու տարրերի հիման վրա: Ռուսաստանը, որպես ՄԽ համանախագահներից մեկը, առանցքային դեր է կատարում ղարաբաղյան կարգավորման գործընթացում»,- ասել է նախագահը:
Արմեն Սարգսյանը նաև նշել է, որ 23 տարի առաջ Ղարաբաղում եռակողմ հաշտությունը կնքվել է հենց Ռուսաստանի միջնորդությամբ:
«Մենք բարձր ենք գնահատում այդ միջնորդական ջանքերը՝ խնդրին խաղաղ քաղաքական լուծում տալու որոնումներում: Ակնհայտ է, որ խնդրի կարգավորման համար անհրաժեշտ է քաղաքական կամք՝ հասնելու խաղաղության և համաձայնության: Իր կողմից Հայաստանն անում է հնարավոր ամեն բան խաղաղության հասնելու համար և ակնկալում է, որ ադրբեջանական կողմը կգործի նույն կերպ»,- ասել է Սարգսյանը:
Նա նաև լավատեսություն է հայտնել Արցախյան խնդիր կարգավորման վերաբերյալ՝ նշելով, որ «վերջին հաշվով տարածաշրջանային բոլոր հակամարտությունները լուծվում են», և «պատմությունը տեսել է ավելի դաժան և ավելի դրամատիկ հակամարտություններ»:
Պատրաստեց՝ Վիկտորյա ԱՆԴՐԵԱՍՅԱՆԸ
