Ապրիլի 17-ին ՀՀԿ-ն վարչապետի թեկնածու կառաջադրի Սերժ Սարգսյանին, ԱԺ-ն նրան կընտրի ու կլիազորի 5 օրում կառավարություն կազմել, որ հետո պիտի հաստատի նախագահը: Վարչապետ Սերժ Սարգսյանը պիտի որոշի` անե՞լ, թե՞ չանել հիմնարար փոփոխություններ:
Հիմա: Սերժ Սարգսյանն ունի 2 ճանապարհ` անփոփոխ թողնել կառավարության կազմը և մինչև տարեվերջ աշխատելու հնարավորություն տալ, փոփոխություններ անելով 2019-ին: Անհրաժեշտ պահին ԱԺ մեծամասնությունը կորոշի անվստահություն հայտնել այս կամ այն նախարարին: Պատճառներ միշտ կան:
Ոչ մի երաշխիք, որ 2018-ի ապրիլին նշանակված կառավարությունն ամբողջ կազմով պաշտոնավարի մինչև 2022:
Բայց Սերժ Սարգսյանը չունի գործողությունների բացարձակ ազատություն նախարարների նշանակման մեջ: Նա հիանալի գիտի, որ իր կառուցած համակարգը կքանդվի, եթե կադրային ընտրության մեջ առաջնորդվի բացառապես պետության շահերով: Պետության շահի ու կուսակցության շահի հակադրության մեջ նա գերակայությունը կտա կուսակցականին, և կվերանշանակվեն յուրայինները, որ վաղուց պիտի հեռանային: Բուրգի ինքնապահպանման ու անվտանգության թելադրանքով:
Իսկ դա նշանակում է, որ խորհրդարանական կառավարման համակարգին անցումով Հայաստանում ոչինչ չի փոխվում` ունեինք միանձնյա որոշումներ կայացնող նախագահ, ունենալու ենք միանձնյա որոշումներ կայացնող վարչապետ: Հազիվ թե Արմեն Սարգսյանը չստորագրի Սերժ Սարգսյանի որոշումներն ու ուղարկի Հրայր Թովմասյանին: Խորհրդարանական կառավարման կայացումը և նոր մոդելի որակները կարող են ի հայտ գալ 2022-ի ընտրություններից հետո: Կարող են նաև ի հայտ չգալ` ՀՀԿ-ն ամեն ինչ կանի այդ ուղղությամբ:
Անահիտ ԱԴԱՄՅԱՆ
Հոդվածն ամբողջությամբ՝ «Իրատես» թերթի այսօրվա համարում
