Այսօր ԱԺ արտաքին հարաբերությունների եւ եվրոպական ինտեգրման հանձնաժողովների համատեղ նիստում քննարկվեց ԵՄ-ի հետ ստորագրված «Համապարփակ եւ ընդլայնված գործընկերության մասին» համաձայնագիրը: Քննարկմանը ներկա էր նաեւ ՀՀ-ում ԵՄ դեսպան Պյոտր Սվիտալսկին:
Փոխարտգործնախարար Կարեն Նազարյանը ներկայացրեց բանակցությունների ընթացքը, նոր համաձայնագրի կառուցվածքը:
Նա ասաց, որ համաձայնագիրը կնպաստի ավելի սերտ տնտեսական համագործակցությանը նաեւ:
ՀՀԿ պատգամավոր Միհրան Հակոբյանը հարցրեց՝ ԵՄ անդամ երկրները մոտավորապես ե՞րբ կվավերացնեն այս համաձայնագիրը: Փոխնախարարը պատասխանեց.
«Մենք գործ ունենք ԵՄ 27 անդամ պետությունների հետ, մեկն արդեն վավերացրել է՝ Էստոնիան, մյուս ուղղություններով աշխատանքներ տարվում են»: Կարեն Նազարյանն ասաց, որ եթե նույնիսկ դա տեղի չունենա ամբողջությամբ, ապա ԱԺ վավերացումից հետո հայկական կողմը կծանուցի այդ մասին եվրոպական կողմին, որից հետո մենք երկրորդ ամսվա առաջին օրը կարող ենք սկսել համաձայնագրի ժամանակավոր կիրարկումը.
«Խոսքը գնում է համաձայնագրի առավելագույն 80 տոկոս մասի կիրարկման մասին, որը շատ հավակնոտ եւ պարտավորեցնող մի գործընթաց է լինելու: Մենք կարեւորում ենք ԵՄ անդամ երկրների կողմից վավերացման գործընթացը, այդ ուղղությամբ տարվում են թիրախային քննարկումներ եւ աշխատանքներ մեր դեսպանությունների կողմից, նաեւ այստեղ հավատարմագրված ԵՄ անդամ երկրների հետ, բայց եւ այնպես, եթե ամեն ինչ ընթանա ժամանակացույցի համաձայն, ԱԺ-ն վավերացնի, հունիսի 1-ին ծանուցումից հետո մենք կարող ենք սկսել համաձայնագրի կիրարկումը»:
Նաիրա Զոհրաբյանն ասաց, որ 2019-ին Եվրոպական խորհրդարանի ընտրություններ են, ուստի սպասում են, որ մինչեւ 2019-ի ամռանը ԵՄ երկրները կվավերացնեն, մայիսի 2-րդ շաբաթում ԵԽ-ն կանդրադառնա փաստաթղթին:
Կարեն Նազարյանն ասաց, որ չկանխատեսելով ԵՄ անդամ երկրների քայլը, իրենց հետ հանդիպումներում ԵՄ գործընկերները վստահեցնում են, որ վավերացման գործընթացը տեղի կունենա բավականին արագ:
«Ծառուկյան» խմբակցության պատգամավոր Լուիզա Սարգսյանը հետաքրքրվեց, թե ընդհանուր ֆինանսների ծավալը որքա՞ն է: Նազարյանը պատասխանեց, որ ԵՄ-ն անշուշտ իր մասնակցությունը կունենա այս համաձայնագրի դրույթների իրականացման հարցում, գոյություն ունի «Միասնական աջակցության շրջանակ» փաստաթուղթը, որն ուղղորդում է ամբողջ ֆինանսական աջակցությունը մի քանի տարիների՝ 2017-2020թթ համար:
Կարեն Նազարյան ասաց, որ այստեղ խոսքը գնում է մինչեւ 176 մլն եվրոյի մասին, որը կունենա տարեկան բաշխում: Այս հարցում արդեն ՀՀ փոխվարչապետն է ներգրավել:
Հռիփսիմե ՋԵԲԵՋՅԱՆ
