ԱԺ «Ծառուկյան» խմբակցության պատգամավորները այսօր մասնակցում են ՀՀ նորընտիր նախագահ Արմեն Սարգսյանի երդմնակալության արարողությանը, սակայն նրանցից Գեւորգ Պետրոսյանը տեղյակ չէ՝ Գագիկ Ծառուկյանը ներկա՞ է, թե՞ ոչ: Լրագրողների հետ զրույցում Պետրոսյանն ասաց. «Մենք կողմ ենք քվեարկել Արմեն Սարգսյանի թեկնածությանը եւ նրա երդմնակալությունը բոյկոտելու տրամաբանություն չենք տեսնում: Մենք հավատում ենք, որ նա դրական փոփոխություններ է բերելու: Նա պարտավոր է արդարացնել այդ հավատը»:
Գեւորգ Պետրոսյանի խոսքով՝ եթե Արմեն Սարգսյանը ժամանակին իսկապես հրաժարվել է Հայաստանի քաղաքացիությունից, դա իր իրավունքն է եւ չի կարելի մարդուն պետական դավաճան համարել:
Պատգամավորը նաեւ ասաց, որ եթե Արմեն Սարգսյանը կհարգի «Ծառուկյան» դաշինքի նախընտրական ծրագիրը, իրենք կօժանդակեն նրան, իսկ եթե ոչ՝ գնահատականներ կհնչեցնեն:
Գեւորգ Պետրոսյանը տեղեկություններ չունի այն մասին, որ Ծառուկյան» դաշինքը ապագայում կոալիցիայի մաս կդառնա:
Լուիզա ՍՈՒՔԻԱՍՅԱՆ
