Օդային ճանապարհով մեր երկիր ժամանող ցանկացած մեկը երկրի մասին առաջին տպավորությունը դեռ օդում է ստանում` տանիքներից: Դրանք, մեր քաղաքների պարագայում, անբարեկարգ են, գունազրկված ու տարբեր գույների տարատեսակ շինանյութերով հավաքած, ինչը մասնավորապես Երեւանի դեպքում ավելորդ խեղճություն ու աղքատություն է հաղորդում:
Տանիքների գեղագիտական տեսքը երբեք էլ քաղաքային իշխանությունների օրակարգում չի եղել. տանիքներին վերաբերող որոշումները սովորաբար միայն դրանք ամրացնելու, վերանորոգելու ու կաթոցները վերացնելու մասով են լինում: Լուսանկարում մայրաքաղաքի կենտրոնի թաղամասերից մեկի շենք-շինությունների տանիքներն են: Մեծ մասը ժանգոտ ու կարկատած. պարզ երեւում է, որ խորհրդային տարիներից ո՛չ դրանց ներկն է թարմացվել, ո՛չ էլ շիֆերները փոխվել: Փողոցով քայլող կամ ավտոմեքենայով սլացող քաղաքի պատասխանատուները գուցեեւ ներքեւում չեն նկատում աչքին տհաճ այդ տեսարանը, բայց վստահ ենք, որ նրանք տարին մի քանի անգամ օդանավով ճամփորդում են:
Լուսանկարը` ԼՈՒՍԻՆԵ ԲՈՒԴԱՂՅԱՆԻ
«Առավոտ»
07.04.2018
