Հայտնի են դարձել «Տարվա լավագույն ստեղծագործություն» մրցանակաբաշխության հաղթողների անունները

Ապրիլի 7-ին Հայաստանի կոմպոզիտորների միության դահլիճում կայացավ «Տարվա լավագույն ստեղծագործություն» մրցանակաբաշխությունը: Երկրորդ տարին անընդմեջ բարի ավանդույթ է դարձել մեծարելու, արժևորելու ու գնահատանքի խոսքեր ասելու այն կոմպոզիտորներին, որոնց ստեղծագործությունները նախորդ տարվա ընթացքում  հնչել են  և բարձր պահել հայ կոմպոզիտորական ընտանիքի բարի անունը։

Սիմֆոնիկ, կամերային, խմբերգային երաժշտության  նաև երաժշտագիտական անվանակարգերում լավագույն ստեղծագործությունները ինչպես անցած տարի, այս տարի ևս արժանացան անվանական մեդալների, պատվոգրերի ու դրամական պարգևների:

Միջոցառումը բացվեց ՀԿՄ նախագահ Արամ Սաթյանի ողջույնի խոսքով, ով կարևորելով կոմպոզիտորներին և երաժշտագետներին խրախուսելու անհրաժեշտությունը, հույս հայտնեց, որ այս պարգևատրումները էլ ավելի մեծ խթան կհանդիսանան նրանց ստեղծագործական գործունեության գործում:

Մինչ մրցանակաբաշխության արարողությունը, ՀԿՄ նախագահը հոբելյանական ուղերձներ հանձնեց  ՀԿՄ անդամեր Մարտին Վարդազարյանին, Մելիք Մավիսակալյանին, Ռոմեն Դավթյանին, Մարտուն Իսրայելյանին և Մարգարիտա Ռուխկյանին՝ ծննդյան 80-ամյա հոբելյանի կապակցությամբ:

Միջոցառման երկրորդ հատվածում տեղի ունեցավ հաղթողների պարգևատրման արարողություն:

Սիմֆոնիկ երաժշտության անվանակարգում լավագույնը ճանաչվեց Երվանդ Երկանյանի 6-րդ սիմֆոնիան: Կամերային երաժշտության անվանակարգում մրցանակը կիսեցին Արսեն Բաբաջանյանը «Zyklus» (ջութակի, թավջութակի և դաշնամուրի համար)  և Աննա Հակոբջանյանը «Հազարան հավքի թևով» (հայկական վիոլայի և տավիղի համար) ստեղծագործություններով: Ժյուրիի որոշմամբ՝ խմբերգային ժանրում լավագույնը ճանաչվեց Վահրամ Սարգսյանի «Մհերի դուռը» ստեղծագործությունը, իսկ Երաժշտագիտական անվանակարգում՝ Աննա Ասատրյանի «Հայաստանի կոմպոզիտորների միություն-85» մենագրությունը:

Հավելենք միայն, որ միջոցառման ընթացքում իրենց երաժշտական կատարումներով ներկաներին ողջունեցին ՀՀ ժողովրդական արտիստներ Մարտին Վարդազարյանը և Ստեփան Շաքարյանը:

Հայաստանի կոմպոզիտորների միություն