ՌԴ նախագահ Վլադիմիր Պուտինն ընտրվելուց անմիջապես հետո մեկնեց Թուրքիա, որտեղ տեղի ունեցավ Պուտին-Էրդողան եւ Իրանի նախագահ Ռոհաննի հանդիպումը: Այսօր ՀՅԴ Հայ դատի գրասենյակի քաղաքական հարցերի պատասխանատու Կիրո Մանոյանը «Անդրադարձ» ակումբում կարծիք հայտնեց, որ Թուրքիա-Ռուսաստան մերձեցումը կարող է բերել նրան, որպեսզի Հայաստանի նկատմամբ իրադարձությունները բացասական ուղղությամբ զարգանան՝ չնայած, որ այդ հանդիպման ժամանակ, ինչպես որ պաշտոնական հաղորդագրություններն են վկայել, որեւէ հարց Հայաստանին, Արցախին առնչվող չի եղել եւ ռուս-թուրքական հարաբերություններում Ադրբեջանի մասին էլ խոսք չի եղել:
Ըստ Կիրո Մանոյանի՝ քննարկումն առնչվել է Սիրիայում իրենց կեցվածքի մասին. «Բայց այն փաստը, որ ռուս-թուրքական հարաբերությունները ռազմավարական բնույթի չեն, բայց հնարավոր է այդ ուղղությամբ են շարժվում, սա պետք մեզ մտահոգության առարկա լինի: Մենք պետք է զգոն լինենք, ուշադիր հետեւենք այդ հարաբերություների զարգացումներին, քանի որ դրանք կարող են վերածվել ռազմավարականի»,-ասաց պարոն Մանոյանը:
Նրա համոզմամբ, եթե ռուս թուրքական հարաբերությունները ունենան ռազմավարական բնույթ, ապա դա թանկ կնստի մեզ վրա. «Սա միայն ռուս-թուրքական չէ, այլ՝ եռակողմ հանդիպում էր՝ Իրանի նախագահի մասնակցությամբ, դա նույնպես պետք է մեզ զգոն պահի, քանի որ այս երեք պետությունները ճիշտ է ունեն հակառակ շահեր, բայց իրենց շահերը նաեւ համընկնում են Սիրիայի մասով: Խուճապի մատնվելու կարիք չկա, բայց պետք է զգոն լինենք»:
Հատկապես, որ ըստ պարոն Մանոյանի, ռուս-թուրքական երկկողմանի հարաբերություններում արդեն պայմանավորվածություն կա ատոմակայանի կառուցման մասով, C 400-ի վաճառքը եւ այլն. «Սրանք արդեն պատճառ են, որ մեզ մղի զգոն լինենք»:
Անդրադառնալով հայ-թուրքական արձանագրություններում նոր փաստաթուղթ ունենալուն, ինչ մասին խոսել է ՀՀ նախագահ Սերժ Սարգսյանը, ապա Կիրո Մանոյանն ասաց, որ Հայաստանի նախագահի ասածն այն չէր, որ շուտով պետք է սկսվեն նոր բանակցություններ: Այլ՝ եթե Թուրքիան ակնկալում է, որ նոր փոփոխություններ տեղի ունենան տարածաշրջանում այն ժամանակ նոր պայմաններում նոր բանակցություններ պետք է լինեն: Ինչ վերաբերում է այս հարցում Սփյուռքի դեմ լինել-չլինելուն, ապա պարոն Մանոյանն ասաց, որ սփյուռքը գտնում է, որ այս արձանագրություններում մենք չպետք է ինչ-որ բան վճարենք:
Լուսինե ԲՈՒԴԱՂՅԱՆ
