«Հերյուրանքներ են այն կարծիքները, թե հայ աղջիկները փոքր-ինչ թեթեւաբարո են: Մի քանիսը կարող է, բայց մեր հայ անբարոյական կինը 1000 այլազգի կույս աղջիկ արժի»,-«Նոյյան տապան» լրատվական գործակալությունում լրագրողների հետ հանդիպմանն այսօր նման կարծիք հայտնեց իրավապաշտպան Հայկազ Մակարյանը: «Այլ կանայք իրենց ամեն ինչը «բաց մատյանի» պես են ցույց տալիս ու ամոթխածություն չեն ունենում, իսկ հայ կանայք զղջման եւ ամոթխածության մեջ են: Այլ կանայք ասում են՝ մենք թքած ունենք, իսկ հայ կինն այդպիսին չէ»,-համոզմունքն այսպես բացատրեց նա:
Անդրադառնալով ՀՀ-ում կանանց խնդիրներին՝ Հայկազ Մակարյանը նշեց, որ իր հետազոտություններով՝ հատկապես Սյունիքում, Տավուշում, Շիրակում, Վայոց ձորում մեծ է կանանց հանդեպ բռնությունների եւ խտրական վերաբերմունքի թիվը. «Կանանց ստիպում են կատարել այնպիսի գործեր, որոնցից կինը հրաժարվում է: Օրինակ, անասնապահական եւ այգեգործական ծանր գործեր: Եղել են դեպքեր, որ կինը ծանր մետաղներ է հանձնել՝ գումար վաստակելու համար, ու դա կնոջը ստիպել է ամուսինը: Այո, կինը պետք է աշխատի, բայց դրանից հաճույք պետք է ստանա»:
Իրավապաշտպանի խոսքով՝ Տավուշի որոշ գյուղերում, օրինակ, կինն իրավունք չունի երեկոյան 7-ից հետո ինչ-որ տեղ գնալ, որովհետեւ կա կորակեն «ամուսնու գլխից թռնել»: Ըստ Մակարյանի՝ դա նահապետական մտածելակերպ է եւ հարիր չէ հայ կնոջ բարոյական բարձր կերպարին:
Լուիզա ՍՈՒՔԻԱՍՅԱՆ
