Պաշտպանության նախարարությունը հրապարակել է «Զինվորական ծառայության համար քաղաքացու կամ զինծառայողի պիտանիության աստիճանը որոշող հիվանդությունների ցանկը, ինչպես նաեւ քաղաքացու կամ զինծառայողի առողջական վիճակին հակացուցված զինվորական ծառայության պայմանները սահմանելու մասին» որոշման նախագիծը:
Սրանով որոշվում է, թե որ հիվանդությունների դեպքում է որոշվում զինծառայության պիտանի՞ է, թե՞ ոչ քաղաքացին, կամ ասենք՝ ինչ աստիճանի սահմանափակումներով է պիտանի ծառայության:
Նախագծի հիմնավորմամբ՝ «Որոշման նախագծի համաձայն հստակեցվում են քաղաքացիների առողջական վիճակը բնորոշող հիվանդությունները, դրանց արդյունքում քաղաքացիների տարկետումների կամ ազատումների ձեւակերպումները համապատասխանեցվում են «Զինվորական ծառայության եւ զինծառայողի կարգավիճակի մասին» ՀՀ օրենքի պահանջներին, սահմանվում են առողջական վիճակին հակացուցված զինվորական ծառայության պայմանները՝ ի դեմս սահմանափակումների բնութագրերի և չթույլատրվող ֆիզիկական վարժությունների»:
Aravot.am-ի հետ զրույցում Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն այս նախագծի մասին ասաց, որ իրենք բավականին երկար ժամանակ պայքարում էին, որպեսզի ծառայության պիտանիության վերաբերյալ հիվանդությունների ցանկը հաստատող ցանկը լինի ոչ թե պաշտպանության նախարարի հրամանով հաստատված, այլ օրենքով՝ որպես հավելված. «Հիմա փաստորեն իրավական ակտը պետք է սահմանվի կառավարության որոշմամբ: Սա կես քայլ առաջ է, բայց մեր ակնկալիքը չէր»:
Սաքունցն ասաց նաեւ, որ իրենք դատական գործընթացի մեջ են պաշտպանության նախարարության հետ. «Մենք պահանջում ենք նաեւ սահմանափակումներով շարային ծառայության պարտականությունների շրջանակը սահմանող իրավական ակտը մեզ տրամադրեն, որը, ըստ իրենց, գաղտնի փաստաթուղթ էր համարվում: Դատական գործընթացի ժամանակ գաղտնիությունը բողոքարկում էինք, մեզ ասում էին՝ կհրապարակենք: Հիմա փաստորեն, կարծես սրա վերաբերյալ էլ փաստաթուղթ են մշակում եւ այն կլինի հրապարակային փաստաթուղթ»:
Ինչ վերաբերում է սահմանված հիվանդությունների ցանկին, եւ արդյոք դրանց շրջանակը նախորդի համեմատ ավելի նեղացրել են, թե ոչ, Սաքունցն ասաց, որ ներկայումս իրենց մասնագետները ուսումնասիրում են. «Ցանկը բավականին մեծ է, աշխատում ենք դրա վրա: Ավարտելուց հետո առաջիկայում այդ մասին հայտարարություն կանենք:
Նշենք, որ e-draft.am-ում հրապարակված նախագծով սահմանված ցանկը բավականին ծավալուն է: Ըստ այս ցանկի, օրինակ՝ «Վերջույթների ֆունկցիան խանգարող ծռվածություն կամ կարճություն հիվանդության ժամանակ՝ ձեռքի մինչեւ 5սմ կամ ոտքի մինչև 2սմ կարճություն՝ առանց ֆունկցիայի խանգարման» դեպքում նախատեսվում է՝ սահմանափակումով պիտանի է զինվորական ծառայության համար:
Կամ՝ «խոշոր հոդերի հին կամ սովորույթային հոդախախտումներ՝ հաճախակի, աննշան ֆիզիկական ծանրաբեռնվածության» դեպքում զորակոչիկը` ժամանակավորապես ոչ պիտանի է զինվորական ծառայության համար, զինծառայողը` ոչ պիտանի է զինվորական ծառայության համար: Նույն հիվանդության ժամանակ հազվադեպ, զգալի ֆիզիկական ծանրաբեռնվածության դեպքում՝ սահմանափակումով պիտանի է զինվորական ծառայության համար:
Ոտնաթաթի ձեւափոխում՝
ա) խիստ արտահայտված անատոմիական փոփոխություններով ոչ պիտանի է զինվորական ծառայության համար,
բ) քայլքի զգալի արտահայտված խանգարումով զորակոչիկը` ժամանակավորապես ոչ պիտանի է զինվորական ծառայության համար, զինծառայողը` ոչ պիտանի է զինվորական ծառայության համար,
գ) քայլքի չափավոր արտահայտված խանգարումով` սահմանափակումով՝ պիտանի է զինվորական ծառայության համար,
դ)քայլքի աննշան արտահայտված խանգարումով՝ պիտանի է զինվորական ծառայության համար
Նելլի ԲԱԲԱՅԱՆ
