էլեկտրոնային առողջապահության համակարգի ներդրումը տարբեր խոսակցությունների և դժգոհությունների առիթ է տվել։ Բնակչությունն այս պահին չի պատկերացնում, թե ինչին է այն միտված, իսկ բժիշկները և բժշկական կենտրոնների ղեկավարները կարծում են, թե ամբողջ իրարանցումը ֆինանսների շուրջ է։ Կարևորելով այս բոլոր հարցերը` զրուցեցինք առողջապահության նախարար ԼԵՎՈՆ ԱԼԹՈՒՆՅԱՆԻ հետ։
Որքան գիտեմ` յուրաքանչյուր բժշկական կենտրոն, կլինիկա, անգամ յուրաքանչյուր դեղատուն, յուրաքանչյուր ամիս լուրջ գումարներ պետք է վճարի, որքան տեղյակ եմ, «Արմեդ» ընկերությանը, որն սպասարկելու է էլեկտրոնային առողջապահության համակարգը։
-Ձեզ ընդհատեմ, որպեսզի մեր խոսակցությունն այդ հարցում վերացական չլինի: Դուք ինձ ասեք հստակ կլինիկայի անուն, թե քանի աշխատող ունի և քանի հիվանդ է սպասարկում, և ես Ձեզ հստակ կարող եմ ասել, թե որքան կկազմի այդ կլինիկայի վճարը։ Վստահեցնում եմ Ձեզ, որ վճարի չափը մեծ չէ։
-Որպեսզի այնպես չստացվի, որ առողջապահության նախարարը և լրագրողը նստած հաշվում են տարբեր կլինիկաների փողերը, եկեք խոսենք Ձեր` «Վարդանանց» կլինիկայից։ Յուրաքանչյուր ամիս ինչքա՞ն գումար պետք է փոխանցի այս կլինիկան «Արմեդին»։
-Յուրաքանչյուր ամիս` 300 հազար դրամ (մեր ներկայությամբ հեռախոսազանգով ճշտեց նախարարը և ինքն էլ զարմացավ գումարի չափից- Ժ. Վ.)։
-Տեսա՞ք, պարոն նախարար, որ գումարները փոքր չեն։
-Այո, մեծ փողեր են, բայց սերվեր գնելու համար միայն 5 մլն դոլարի վարկ է վերցրել «Արմեդը», որպեսզի էլեկտրոնային առողջապահության համակարգը գործի դրվի։ Համակարգի անխափան աշխատանքի համար ձևավորվել է 50-հոգանոց աշխատակազմ։ Ինչպես գիտեք, IT մասնագետներն աշխարհում ամենաբարձր վարձատրվողներն են. մեզանում նրանց աշխատավարձը չպետք է ցածր լինի 1,5 հազար դոլարից, որպեսզի ապահովվի բարձրորակ աշխատանք։ Եվ, ի վերջո, էլեկտրոնային առողջապահության համակարգի ներդրման համար դեռևս 2010-ին կառավարությունը հայտարարել էր մրցույթ, և հաղթող էր ճանաչվել «Արմեդը»։
-Վճարը շատ լինի, թե քիչ, եթե Դուք, որպես նախարար, կարևորում եք էլեկտրոնային առողջապահությունը, հետևաբար, ներկայացնում եք պետության մտահոգությունը ժողովրդի առողջության պահպանման և ֆինանսներն ուղղորդելու հարցում։ Այդ դեպքում ինչու՞ այդ համակարգը սպասարկող ընկերությունը «Արմեդն» է, այսինքն` մասնավորը, և ոչ պետական ընկերությանն է վստահված այդ գործընթացը։ Ավելի նպատակահարմար չէ՞ր լինի, եթե այն իրականացներ պետությունը, ոչ թե մասնավորը։
-Ոչ, որովհետև պետությունը կոչված չէ նման ֆունկցիա իրականացնելու։ Այն երկրներում, որտեղ այդ համակարգը գործում է, այն իրականացնում է մասնավոր հատվածը։ Գուցե փորձեինք այդ գործառույթը տալ պետությանը, սակայն տարիների ընթացքում կպարզվեր, որ այդ փորձն անարդյունավետ է, և, կուտակելով կոռուպցիայի ռիսկերը, պետությունը կգար այն համոզմունքին, որ այդ գործընթացը պետք է փոխանցվի մասնավորին` վերահսկելով նրա գործունեությունը։ Եվ, ի վերջո, IT տեխնոլոգիաները գնալով զարգանում են մասնավոր ընկերություններում, պետությունը չի կարող ստեղծել նման զարգացած ընկերություն։
-Լավ, այդ դեպքում հստակեցնենք` «Արմեդին» փոխանցված գումարները ի՞նչ նպատակի են ծառայելու, ու՞ր են ուղղորդվելու։
-Այ, Դուք, որպես լրագրող, կարող եք անցկացնել Ձեր ուսումնասիրությունը, հետաքննությունը` պարզելու, թե հետագայում այդ կուտակված միջոցներն ինչի վրա են ծախսվում։ Այդպիսով Դուք կնպաստեք էլեկտրոնային առողջապահության համակարգի զարգացմանը։ Իմ գործառույթի մեջ չի մտնում հաշվարկել և հասկանալ, թե ուր է ուղղորդելու այդ գումարները կոմերցիոն կազմակերպությունը։ Դրա համար կան վերահսկող կառույցներ։
Զրուցեց Ժասմեն ՎԻԼՅԱՆԸ
Հարցազրույցն ամբողջությամբ՝ «Իրատես» թերթի այսօրվա համարում
