Հենց նրա` այդ հանճարեղ մարդու տեսախցիկին են պատկանում «Խոշոր շահում», «Քաոս», «Մորգանի խնամին», «Հեղնար Աղբյուրը» եւ ավելի քան 30 ֆիլմերի ստեղծումը: Դնելով սիրտը, հոգին, տաղանդը` նա կարողացավ նկարել այնպիսի ֆիլմեր, որոնք մնացել ու կմնան մեր ու մեր սերունդների հիշողության մեջ հավերժ…
Երեկ Երեւանի Խաչատուր Աբովյանի Պետական Մանկավարժական համալսարանի աստիճաններով, դժվար, բայց հպարտ եւ հաստատուն քայլերով ներս մտավ Վարպետը: Այնքան գեղեցիկ եւ հարուստ էր նրա խոսքը, այնքան հարստության կար այդ պատմությունների մեջ, որ կարծես մի ամբողջ աշխարհ բեմից ուսանողներին էր փոխանցում իր փորձը: Անմիջական եւ մտերմիկ շփման մեջ էին Աթոյանցը եւ ուսանողները:Վարպետը մեծ սիրով եւ հիացմունքով պատասխանեց ուսանողների տված հարցերին: Ուսանողներից մեկը հարցրեց, թե ում հետ է կապված Վարպետի ամենալավ հիշողությունները:
Վարպետի պատասխանը կանխատեսելի էր.
-Ես աշխատել եմ շատ դերասանների եւ ռեժիսորների հետ, բայց ամենահեշտը եւ հաճելին Ֆրունզիկի հետ աշխատելն էր: Նույնիսկ ֆիլմ ունեմ նրան նվիրված: Նա լավ մարդ էր, լավ ընկեր եւ հրաշալի դերասան:
Հանդիպման ընթացքում Աթոյանցը պատմեց իր կյանքից, հիշողություններից, գործունեությունից:Վերջում Աթոյանցին տրվեց հանդիսատեսին ամենահուզող հարցը: Թե արդյոք, ինչ քայլեր պետք է անել, հայ կինոն վերածնելու եւ վերակենդանացնելու համար:
-Գիտեք, որն է մեր խնդիրը, որ մեր օպերատորները, ռեժիսորները, դերասանները, ոչ թե նայում են որակին, այլ ֆինանսին: Դուրս եմ գալիս տեսնելու, թե ինչպես են նկարում ֆիլմերը այսօր, եւ տեսնում եմ, որ օպերատորների մեծ մասը չունի հանրային ճանաչում, չնայած նրան, որ տաղանդավոր երիտասարդներ են:
Վարպետաց դասը վարեց դասախոս Սերգո Երիցյանը:Ընթացքում ցուցադրվեցին Աթոյանցի «Հեղնար Աղբյուրը», «Փիղն ու Զինվորը», «Ուրախ- տխուր մարդը», «Ավդոյի Մեքենան» ֆիլմերից եւ նկարահանման հրապարակից հատվածներ:
Ցերեկույթի ավարտին Ս.Երիցյանը Մանկավարժական համալսարանի ռեկտոր Ռ.Միրզախանյանի կողմից Վարպետին հանձնեց Արամ Հակոբյանի «Հայազգի ծովանկարիչներ» գիրքը եւ Շմավոն Շմավոնյանի կողմից իր հեղինակային «Արարատ» ալբոմը:
ԳՐԵՏԱ ՄՆԱՑԱԿԱՆՅԱՆ
«Առավոտ»
05.04.2018
