«Քրեական գործի նյութերում չկան տվյալներ այն մասին, որ սարիթաղցիները եղել են ալկոհոլի ազդեցության տակ,-Aravot.am-ի հետ զրույցում մեկնաբանելով վկա-ոստիկանների ցուցմունքներն այն մասին, որ 2016թ.-ին սարիթաղցիների եւ ոստիկանների բախման ժամանակ բնակիչները եղել են խմած, ասաց բնակիչների շահերի պաշտպան, փաստաբան Լիպարիտ Սիմոնյանը: Հիշեցնենք՝ հերթական նման ցուցմունքն այսօր դատարանում տվեց մեկ այլ ոստիկան:
Ինչ վերաբերում է նրա պնդմանը, թե սարիթաղցիները ցանկացել են գնալ-միանալ ՊՊԾ գունդը գրավածներին, փաստաբանը վստահեցնում է. «Որեւէ մեկը գնդին մոտենալու հարց չի բարձրացրել: Հարցերը միայն կենցաղային խնդիրներին են վերաբերել: Ուղղակի ոստիկանները, չգիտես ինչու, փորձում են վիճակն ավելի ծանրացնել եւ իրենց խոսքում ՊՊԾ գունդը հիշատակել: Հարցաքննված վկաների 90 տոկոսը հավաստել է, որ գնդի մասին խոսք չի եղել: Անգամ ոստիկան Արմեն Գալստյանը, որը տուժող է, ասել է, որ սարիթաղցիները ՊՊԾ գնդի անուն չեն տվել»:
Պաշտպանը հավելեց՝ հատկանշական է, որ միջադեպի մասնակից ոստիկաններից ոչ-ոք դատարանում սարիթաղցիներին դեմքով չի մտաբերում, չի ճանաչում: Հիշեցնենք, որ մի քանի օր շարունակ Սարի թաղում ջուր եւ գազ չի եղել, դեպի Խորենացի փողոց՝ ՊՊԾ գնդի կողմ տանող ճանապարհն էլ փակ է եղել (տարածքը գրավված էր «Սասնա ծռեր» զինված խմբի կողմից), ինչի պատճառով բնակիչները դուրս էին եկել փողոց բողոքելու. նրանց եւ ոստիկանների միջեւ բախում էր տեղի ունեցել: Այս գործով ձերբակալված է մեկ տասնյակ քաղաքացի. մեղադրվում են ոստիկանների հանդեպ բռնություն գործադրելու մեջ:
Լուիզա ՍՈՒՔԻԱՍՅԱՆ
