Ոչ ոք իրենց չէր խոչընդոտի, եթե զինված խումբ կազմեին ու գնային «ռազմավարական բարձունքն» ազատագրելու: Բայց չէ, իրենք զինված խումբ կազմեցին ու գրոհեցին ՊՊԾ գունդը. «Հայոց աշխարհ»

Նախանցյալ տարի ոստիկանության ՊՊԾ գունդը գրաված, երեք ոստիկանի սպանության պատճառ դարձած զինված խմբի՝ ընդհանուրից անջատված գործերից մեկով երեկ դատական նիստ կար:

Պատկերն, ընդհանուր առմամբ, նույնն է՝ զինված խմբի անդամները ձգտում են հնարավորինս հեռանալ առաջադրված մեղադրանքներից կամ քննությամբ ներկայացված ապացույցներից: Փոխարենը, զանազան հայտարարություններ ու վիրավորական արտահայտություններ են հնչեցնում երկրի ղեկավարության, իշխանությունների, այդ էլ որ չլինի՝ մեղադրողների կամ դատարանի հասցեին, ինչին հաջորդում են դատարանի անխուսափելի սանկցիաները:

Զինված խմբի գործողությունների հետեւանքով, ինչպես հայտնի է գործի նյութերից, երեք հայ ոստիկան է սպանվել: Բայց զինված խմբի անդամներից շատերը դատարանում այնպիսի վարք են դրսեւորում, ասես կա՛մ ոչ մի նման բան չի եղել, կա՛մ իրենք դրա հետ կապ չունեն:

Իսկ երեկ ամբողջ զինված խմբի կամ ինչպես իրենք են նշում՝ խմբավորման անունից հայտարարություն տարածվեց՝ անվանապես ուղղված Զինված ուժերի գլխավոր շտաբի պետ, գեներալ-գնդապետ Մովսես Հակոբյանի դեմ: Ակնհայտ է, որ Ժիրայր Սեֆիլյանի վերջին տարիների զինակից Վարուժան Ավետիսյանի ղեկավարած զինված խումբը փորձում է ինչ-որ դերակատարում ունենալ երկրում հավելյալ լարվածություն ստեղծելու՝ իրենց «գաղափարական աջակիցների» նապոլեոնական ծրագրերում:

Իսկ, մյուս կողմից, նման հայտարարություններն ու անպատասխանատու կոչերը նաեւ իրենց ներկայացված կոնկրետ մեղադրանքներից ուշադրություն շեղելու լրացուցիչ միջոց են:

Ինչո՞ւ են այս անգամ հիշել գլխավոր շտաբի պետին: Իրենց անունից տարածած հայտարարության համաձայն, որովհետեւ նա հայտարարել էր, որ ապրիլյան պատերազմի ժամանակ հակառակորդի վերահսկողությանն անցած, այսպես կոչված, «Լելեթեփե» բարձունքը ռազմավարական նշանակություն չունի: Վերջ, այդքանը բավական էր, որպես պատրվակ, որ զինված խմբի անունից տարածված հայտարարության մեջ ինչ ասես՝ ասվի Մովսես Հակոբյանի հասցեին:

Առհասարակ այս բարձունքի հարցը վերջին երկու տարվա ընթացքում, առավել եւս այս օրերին, չափից շատ է ծեծվում: Հասկանալի է, որ դա զուտ քարոզչական, հակաքարոզչական նպատակներով է արվում: Ի վերջո, երեւի ոչ ոք իրենց չէր խոչընդոտի, եթե զինված խումբ կազմեին ու գնային «ռազմավարական բարձունքն» ազատագրելու: Բայց չէ, իրենք զինված խումբ կազմեցին ու լուսադեմին մայրաքաղաքի կենտրոնում գրոհեցին ոստիկանության ՊՊԾ գունդը՝ երեք հայ մարդու սպանության պատճառ դառնալով:

Մ. ՍԱՀԱԿՅԱՆ

Հոդվածն ամբողջությամբ կարդացեք «Հայոց Աշխարհ» օրաթերթի այսօրվա համարում