«Առավոտին» հասած տեղեկություններով՝ Ալ. Սպենդիարյանի անվան օպերայի եւ բալետի ազգային ակադեմիական թատրոնում աժիոտաժ է, ստեղծագործական խմբերը ձեռնամուխ են եղել միանգամից չորս օպերային բեմադրությունների: Առայժմ դասարաններում ընթանում են Մոցարտի «Կախարդական սրինգ» (ռեժիսոր՝ Պաոլո Միչիկե), Բիզեի «Կարմեն» (ռեժիսոր՝ Նաիրե Ստեփանյան), Չուխաջյանի «Կարինե» (ռեժիսոր՝ Ժիրայր Փափազյան), իսկ բեմում Մասնեի «Մանոն» օպերաների փորձերն են:
«Այսօր աշխարհի ցանկացած երկիր չի կարող հպարտանալ իր օպերային ձայներով այնպես, ինչպես Հայաստանը: Իմ ցանկությունն է աշխարհին ներկայացնել ոչ միայն առանձին հայազգի ձայներ, այլ հասնել նրան, որ Երեւանի օպերային թատրոնն ընդգրկվի 39 երկրից 156 անդամ ունեցող հեղինակավոր օպերային թատրոնների ու փառատոների «Opera- Europa» միավորման կազմում»,- այս մասին մեզ նախորդ այցի ժամանակ (21.11.2014թ.) հայտնել էր լատվիացի անվանի ռեժիսոր Անդրեյս Ժագարսը: Երկու տարի անց նրա ցանկությունը կատարվեց՝ շնորհիվ մաեստրո Օրբելյանի:
«Մանոնի» փորձից:
Չորս տարի անց կրկին Երեւանում է լատվիացի ռեժիսորը, որն իր ասիստենտ Իրինա Լիչագինայի ընկերակցությամբ սկսել է Մասսնեի «Մանոն» օպերայի բեմադրական աշխատանքները: Մաեստրո Ժագարսը կինոդերասանի կարիերայից հետո 17 տարի՝ մինչեւ 2013թ., հանդիսացել է Լատվիայի ազգային օպերային թատրոնի տնօրենը: Մինչ այսօր հեղինակավոր օպերային թատրոններում նա բեմադրել է համաշխարհային եւ ժամանակակից օպերային գրականության շուրջ 20 ստեղծագործություն:
Օրերս մենք ներկա էինք «Մանոնի» փորձին: Պարզվեց, որ Երեւանի օպերային թատրոնի պատմության մեջ առաջին անգամ բեմադրվող այս ստեղծագործության համար թատրոնի գեղարվեստական ղեկավար, ՌԴ վաստակավոր արտիստ Կոնստանտին Օրբելյանը, որը նաեւ այս օպերայի բեմադրող դիրիժորն է, հրավիրել է ոչ միայն անվանի ռեժիսորին, այլեւ ճանաչված օպերային տենոր, Նիդեռլանդների Մաաստրիխ քաղաքի կոնսերվատորիայի պրոֆեսոր Ակսել Էվերարտին, որը ներկայումս դասավանդում է Լատվիայի ազգային օպերային թատրոնում: Նա նաեւ ֆրանսիական եւ իտալական երաժշտության, վոկալ տեխնիկայի փորձագետ է:
Մերի Մովսիսյանն ու մաեստրո Ժագարսը:
Հրավիրված է Սորբոնի համալսարանում ուսանած ֆրանսերենի մասնագետ Լյուբա Թադեւոսյանը եւս, քանի որ ներկայացումը բնօրինակով է՝ ֆրանսերեն, եւ օպերայում շատ են երկխոսությունները: Լիբրետոյի հեղինակներն են Անրի Մելիակին եւ Ֆիլիպ Ժիլին՝ ըստ ֆրանսիացի գրող Աբբա Պրեւոյի «Ասպետ դը Գրիեի եւ Մանոն Լեսկոյի պատմությունը» վիպակի (1731թ.): Պրեմիերան կայացել է Փարիզի «Օպերա-կոմիկ» թատրոնում, 1884թ.: Իսկ թե Երեւանի օպերային թատրոնում երբ տեղի կունենա պրեմիերան, մենեջմենթի բաժնից հայտնեցին, որ այն առայժմ ստույգ որոշված չէ:
Ի դեպ, Անդրեյս Ժագարսի բեմադրությամբ վերջերս Մոսկվայի Ստանիսլավսկի- Նեմիրովիչ-Դանչենկոյի թատրոնում կայացել է «Մանոնի» պրեմիերան, որին հրավիրված էր Ազգային օպերային թատրոնի մեներգիչ, տենոր Լիպարիտ Ավետիսյանը (Ասպետ դե Գրիե): Նշենք, որ «Մանոնում» հանդիսատեսը կհանդիպի ոչ միայն ճանաչված, այլեւ նոր-նոր կարիերա սկսող երիտասարդ արտիստների: Փորձի ժամանակ Մանոնի դերերգով երիտասարդ սոպրանո Մերի Մովսիսյանն էր: Ինչպես միշտ, այս ներկայացումն էլ հնարավոր չի լինի առանց թատրոնի նվագախմբի (գլխավոր կոնցերտմայստեր՝ Գայանե Աբրահամյան) եւ երգչախմբի (գլխավոր խմբավար՝ Կարեն Սարգսյան):
Կարեն Սարգսյանը, Իրինա Լիչագինան, Անդրեյս Ժագարսը եւ Ակսել Էվերարտը:
ՍԱՄՎԵԼ ԴԱՆԻԵԼՅԱՆ
«Առավոտ»
04.04.2018
Կարծում եմ, որ ավելորդ բեմադրություն է: Քանի որ, այն ո՛չ մեր հասարակությանն է հետաքրքրելու, (չգիտես ինչու, այս հանգամանքը մեզանում չի կարևորվում), ո՛չ մեր արտիստները կարող են դրանով եվրոպայում հանդես գալ, ո՛չ մշակութային տուրիզմը կզարգանա, ո՛չ Ֆրանսիային կհետաքրքրի, ո՛չ էլ համապատասխանում է մեր պետական մշակութային քաղաքականությանը՝ այն է. ազգային մշակույթի զարգացման, պահպանման և տարածմանը … Հարգանքով՝ Աշոտ Բաբայան