Ադրբեջանում ապրիլի 11-ին սպասվող նախագահական ընտրություններին ընդառաջ ընդդիմադիր ուժերը բոյկոտել են ընտրությունները եւ կազմակերպում են զանգվածային բողոքի երթեր, որոնց ժամանակ հնչում են հակահայկական կոչեր: Այս մասին այսօր «Տեսակետ» մամուլի ակումբում լրագրողների հետ հանդիպմանն ասաց Ադրբեջանի հարցերով փորձագետ Տաթեւիկ Հայրապետյանը:
Նա տեղեկացրեց, որ սոցիալական խնդիրներին ու կոռուպցիային առնչվող կոչերից բացի՝ մարտի 30-ի ցույցի ժամանակ պարզվել են «դատապարտեք հայկական ահաբեկչությունը», «վերադարձրեք Ղարաբաղը», «չենք զիջի Ղարաբաղը ոչ մեկին» գրություններով պաստառներ:
«Նախընտրական շրջանն ակտիվորեն օգտագործվում է հակահայկական քարոզչության համար: Նման կոչերը թեեւ հնչում են վերահսկվող ընդդիմության կողմից, բայց ձեռնտու են նաեւ իշխանություններին»,-նկատեց Տաթեւիկ Հայրապետյանը:
Նրա դիտարկմամբ՝ ընտրություններից հետո Ադրբեջանում «Ղարաբաղը վերադարձնելու» քարոզչությունն ավելի կկոշտանա՝ ստանալով պահանջատիրական բնույթ:
Զուգահեռ, ինչպես փորձագետը նշեց, Ադրբեջանում երեկ հրթիռահրետանային փորձարկումներ են կատարել. «Այդպես փորձում են ցույց տալ, թե պատրաստ են կատարելու ցանկացած հրահանգ»:
Անդրադառնալով դեռեւս պաշտոնապես չհաստատված տեղեկություններին, որ ՀՀ-ի եւ Ռուսաստանի միջեւ սպառազինության ձեռքբերման նոր վարկ է ձեւակերպվելու, փորձագետը նշեց. «Ադրբեջանական մի շարք լրատվամիջոցներում այդ լուրին արձագանքեցին՝ ասելով, թե կողմերը հավանական են համարում հնարավոր պատերազմը եւ պատրաստվում են դրան»:
Մեկնաբանելով ռուս պաշտոնյաների՝ վերջերս հնչեցրած հայտարարությունները, թե ՌԴ-ն կրճատելու է Ադրբեջանին մատակարարվող սպառազինության ծավալը, Տաթեւիկ Հայրապետյանն ասաց. «Ռուսաստանն այս կերպ փորձում է մեղմացնել Ալիեւի՝ «Երեւանը վերադարձնելու» մասին հայտարարությունները, որոնք տարածքային հավակնություններ են պարունակում Հայաստանի հանդեպ: Խնդիրն այն է, որ պատմությունը կեղծվում է, ու այդ կեղծիքներն օրակարգում են դրվում»:
Լուիզա ՍՈՒՔԻԱՍՅԱՆ
