Հայաստանյան հասարակական գործիչներն անհանգստացած են այն որոշմամբ, որ հայաստանցիների շենգենյան վիզայի դիմումները կընդունի ռուս-թուրքական «ՎիզաՄետրիկ» ընկերությունը: Հիշեցնենք, այդ տեղեկությունը մամուլի ասուլիսում օրերս հրապարակել էր ՀՀ-ում Գերմանիայի դեսպան Մաթիաս Քիսլերը:
Այսօր «Հենարան» մամուլի ակումբում «Հանուն կայուն մարդկային զարգացման» ՀԿ-ի նախագահ Կարինե Դանիելյանը եւ «Հայ կանայք հանուն առողջության եւ առողջ շրջակա միջավայրի» ՀԿ-ի նախագահ Միլենա Մանվելյանն իրենց մտահոգությունները ներկայացրին:
«Մեզ անհանգստացնում է այն, որ մեր ազգի ներկայացուցիչների անձնական տվյալներ`զգալի եւ կարեւոր, վիզա տրամադրելիս պահանջվում եւ ներկայացվում է: Նաեւ երեւում են տարբեր կապերը տարբեր երկրներում եւ տարբեր ոլորտներում: Ազգի ակտիվ մասի վերաբերյալ բոլոր տվյալները վերցնել եւ նվիրել Թուրքիային`չի կարելի»,- ասաց Կարինե Դանիելյանը:
Բանախոսների համար զարմանալի է նաեւ այն, որ գերմանական դեսպանատունն է դա արել, քանզի իրենք տեղյակ են պատմական անդրադարձերին, իրենք էլ ճանաչել են ցեղասպանությունը: Բանախոսները բավական ուրախ են ՀՀ իշխանությունների արձագանքից եւ կոչ են անում որեւէ զիջման չգնալ:
Այլ մանրամասները`տեսանյութում
Նելլի ԳՐԻԳՈՐՅԱՆ
