Հյուսիսային պողոտայում գտնվող արագ սննդի կետում պայթյունի հետեւանքով Երեւանի Գրիգոր Լուսավորիչ ԲԿ է տեղափոխվել 8 տուժած:
Այս պահին Հյուսիսային պողոտայում է նաեւ ԱԻՆ նախարար Դավիթ Տոնոյանը: Նա լրագրողների հետ զրույցում ասաց, որ նախնական պատճառը պայթյունի գազի բալոնն է. «Գարեջրի բալոններին մատակարարում էր ճնշում»:
Նախարարն ասաց, որ հիմա դժվար է որեւէ բան ասել՝ բալոնի պահպանման պայմաննե՞րն են խախտվել, թե՞ այլ բան, փորձագետներն աշխատում են: Հարցին՝ ԱԻՆ-ը ստուգումներ չի՞ իրականացնում, վերահսկողը ԱԻՆ-ը չէ՞ր՝ նախարարը պատասխանեց, որ այս փուլում ԱԻՆ-ի գործառույթը չկար. «Մինչեւ պայթյունը գործառույթ չկար»:
Հարցին՝ ի՞նչը կարող էր պատճառ լինել, որ պայթեր գազի բալոնը՝ նախարարը պատասխանեց. «Կարող է ճնշման տատանում լինի, կարող է ճնշումը ավել լինի, բայց սա գործարանային է, պետք է ստուգվի»:
Նախարարն ասաց, որ այս պահին ճիշտ չի լինի մեղավորների մասին խոսել:
Ի տարբերություն ԱԻՆ-ի փոխգնդապետ Կոստանյանի, նախարարն ասաց, որ 8-ամյա Ռուբինայի վիճակը ծանր է, բայց կյանքին վտանգ չի սպառնում:
Հռիփսիմե ՋԵԲԵՋՅԱՆ
