Թուրքագետ Ռուբեն Սաֆրաստյանը կարծում է, որ Գյումրիում ռուսական ռազմական ոստիկանության տեղակայումը պայմանավորված չէ տարածաշրջանային քաղաքական գործընթացներով եւ ՀՀ-ում Ռուսաստանի դերակատարումն ավելացնելու միտմամբ: Այս մասին նա այսօր կարծիք հայտնեց «Հայելի» մամուլի ակումբում՝ լրագրողների հետ հանդիպմանը:
Փորձագետը ռուս ոստիկանների՝ Գյումրիում գտնվելու մեջ վտանգ չի տեսնում: «Նրանք գործելու են ռուսական ռազմակայանի շրջանակում, քանի որ կայանում կարգապահական խնդիրները լուրջ են: Նրանց կարգի հրավիրելու խնդիր կա»,-վստահեցրեց Ռուբեն Սաֆրաստյանը:
Ապա` անդրադառնալով փորձագիտական գնահատականներին այն մասին, թե Թուրքիան սիրիական Աֆրինը գրավելուց հետո հայերի հանդեպ գործողություններ կիրականացնի, Ռուբեն Սաֆրաստյանը նշեց. «Չեմ կարծում, որ Հալեպի ուղղությամբ Թուրքիան որոշակի մեծամասշտաբ գործողություններ կիրականացնի: Թուրքիայի համար հիմա նշանակություն չունի հայերի դեմ գործողություններ կազմակերպելը, առավել եւս, որ Աֆրինի շրջանում, ըստ տեղեկությունների, հայեր չեն մնացել»:
Լուիզա ՍՈՒՔԻԱՍՅԱՆ
