«Պարոն Միլսը սխալվում է, երբ ասում է ընտրված իշխանություն: Նա մեծագույն սխալ է թույլ տալիս, որովհետեւ ընտրությունների արդյունքները կեղծվել են, ընտրությունները տեղի են ունեցել մասսայական ընտրակաշառք բաժանելու արդյունքում եւ շատ տեղամասեր պարզապես փոխել են արդյունքները: Այնպես որ, այդքանով պարոն Միլսը սխալվում է: Ինչ մնում է նրան, որ չեն աջակցում Սասնա ծռերին, դա իրենց երկրի քաղաքականությունն է, ինչ էիք մտածում, որ ԱՄՆ-ն կամ որեւէ այլ երկիր պետք է հայտարարեր, որ զենքով պայքարի՞ են աջակցում»,- Aravot.am-ի հետ զրույցում քաղաքացիական ակտիվիստ Դավիթ Սանասարյանն այսպես մեկնաբանեց ԱՄՆ դեսպան Ռիչարդ Միլսի՝ Aysor.am-ին տված մեկնաբանությունը՝ «Սասնա ծռերի» մասին:
Միլսն ասել էր, որ «Մենք չենք աջակցում այնպիսի խմբերի, որոնք փորձում են անօրինական ճանապարհով տապալել ընտրված իշխանություններին: Եվ հատկապես այնպիսի խմբերին, ինչպիսին «Սասնա Ծռերն» են, որոնք բռնությունը գերադասում են երկխոսությունից, մենք միանշանակ դատապարտում ենք: Մենք չենք հանդուրժում «Սասնա Ծռերի» և մյուսների գործողությունները, ովքեր դիմում են բռնության կամ ովքեր սպառնում են վնաս պատճառել մյուսներին՝ իրենց քաղաքական օրակարգն առաջ տանելու համար: Անցած տարի «Սասնա Ծռերի» անդամների գործողությունների հետեւանքով մարդկային կյանքեր կորսվեցին, իսկ մերձակա համայնքի բնակիչները անհարկի հայտնվել էին սոսկալի իրավիճակում»:
Դավիթ Սանասարյանի խոսքով՝ «Ինձ համար նորություն չի ասել պարոն Միլսը, հետո սա մեր երկրի ներքին գործերն են, բայց երբ որ պարոն Միլսը խառնվում է մեր երկրի ներքին գործերին եւ ասում ընտրված իշխանություն, այդ պարագայում իրականությունից կտրված է պարոն Միլսի, այն ժամանակ իրենց նախագահ Օբամայի մոտեցումները: Օբաման առաջինն էր, որը ճանաչեց այդ կեղծած ընտրությունները»:
Դավիթ Սանասարյանն ասաց, որ իշխանական լրատվամիջոցներն էին փորձում այնպիսի տպավորություն ստեղծել, թե Արեւմուտքը, ԱՄՆ-ն աջակցում էր Սասնա ծռերին ու բանը հասավ նրան, որ այդ երկրի դեսպանն ասի՝ մենք կապ չունենք:
Մեր հարցին՝ ըստ ձեզ, ովքե՞ր են «Սասնա ծռերին» աջակցողները՝ Սանասարյանը պատասխանեց. «Բազմահազարանոց քաղաքացիները: Դուք տեսել եք ցույցերը, բացի դրանից, Սփյուռքից, ամենատարբեր տեղերից իրենց աջակցությունն են հայտնել մեր հայրենակիցները: Որեւէ պետություն չեք գտնի, որ Սասնա ծռերին աջակցում է, մեր հայրենակիցներն են»:
Դիտարկմանը, որ «Սասնա ծռերին» աջակցող միայն նեղ շրջանակ կա՝ Դավիթ Սանասարյանը չհամաձայնեց. «Բազմահազարանոց քաղաքացիների աջակցությունը մենք տեսել ենք Խորենացի եւ մյուս փողոցներում, քաղաքացիները իրենց սոլիդարությունը, համախոհությունն են հայտնել: Ես ինքս այդտեղ իմ աջակցությունը հայտնել եմ: Իշխանությունը հակաօրինական ձեւով, ապօրինի ձեւով վերցնում է իշխանությունը, մյուս կողմը չի ընդունում իրենց արդյունքները եւ իրավասություն է վերցնում, որ բալանսի բերի, այսինքն, ուզում է ասել, որ եթե դու ուժ ունես, ես էլ ունեմ: Շատ կցանկանայի, որ Հայաստանում երբեք նման բաներ չլինեին: Եթե ընդունում ենք, որ իշխանությունը ապօրինի է, ուրեմն ովքեր դատապարտում են «Սասնա ծռերին», կողմնակիցը չեն զինված պայքարին, նրանք պիտի դատապարտեն նաեւ իշխանություններին: Ես ինքս զինված պայքարի կողմնակիցը չեմ, բայց երբեւիցե չեմ դատապարտել «Սասնա ծռերին», որովհետեւ նրանք իրենց իրավունքն են իրացնում»:
Հռիփսիմե ՋԵԲԵՋՅԱՆ
«Բազմահազարանոց քաղաքացիներ», զառանցական երեւակայութեանդ մէջ միայն
Սփիւռքի պարագային, յիսուն հոգի չես գտներ որ համաձայն են այդ արունահեղ յիմարութեան հետ. այդ յիսունից քառասունհինգն ալ Հայաստանից փախած դասալիքներից են.