Արցախի Արտակարգ իրավիճակների պետական ծառայությունը հայտնել է ականի հետևանքով մահացածների և վիրավորների ինքնությունը։ Aravot.am-ի հետ զրույցում ԱԻՊԾ տեղեկատվության և հասարակության հետ կապերի բաժնի սպա Գառնիկ Ալեքսանյանն ասաց, որ «The HALO trust» ականազերծող կազմակերպությանը պատկանող մեքենան պայթել է ականի վրա:
Այսօր՝ ժամը 09.27-ին, Արտակարգ իրավիճակների պետական ծառայությունը ահազանգ է ստացել, որ Մարտակերտի շրջանի Ղազանչի գյուղի տարածքում ավտոմեքենա է պայթել և նախնական տվյալներով կան վիրավորներ:
Դեպքի վայր հասնելով պարզվել է, որ Ղազանչի գյուղի հարակից տարածքում ականի վրա պայթել է «The Halo trust» ականազերծող կազմակերպությանը պատկանող մեքենան, ինչի հետևանքով մահացել է 3 ականազերծող՝ Պավել Հակոբովը, Մարատ Պետրոսյանը, Սամսոն Ավանեսյանը, իսկ աշխատակիցներ Արամ Մկրտչյանը, Գարիկ Ղահիրյանն ստացել են տարբեր աստիճանի մարմնական վնասվածքներ։
Գ․ Ալեքսանյանը նշեց, որ «The HALO Trust»-ը սերտորեն աշխատում է Արցախի Հանրապետության իշխանությունների, ԱԻՊԾ-ի և Ոստիկանության հետ, բացի դրանից դրսից հրավիրվել են փորձագետներ, որպեսզի լիարժեք փաստեր ներկայացվեն պատահարի մասին:
Դավիթ ԱԲԱՂՅԱՆ
