ՀՀ կառավարությունն այսօր որոշեց ՀՀ նախագահ Սերժ Սարգսյանին ապահովել բնակարանով: Սա օրենքի պահանջն է: Կառավարության նիստի օրակարգում հարցը չզեկուցվողների թվում էր: Այն օրակարգի 46-րդ հարցն է: Համաձայն նախագծի՝ Հայաստանի Հանրապետության Նախագահի աշխատակազմի ենթակայության «Կոնդի առանձնատների տնտեսություն» պետական ոչ առևտրային կազմակերպության հաշվեկշռում ամրացված՝ 6-րդ մասնաշենքի մեջ մտնող շենքը և շինությունները՝ 1.5365 հա սպասարկման տարածքով, հետ վերցնել եւ սեփականության իրավունքով անհատույց տրամադրել Հայաստանի Հանրապետության պաշտոնաթող նախագահ Սերժ Սարգսյանին՝ որպես բնակարան:
ՀՀ աշխատանքի եւ սոցիալական հարցերի նախարարին, Հայաստանի Հանրապետության կառավարության աշխատակազմի ղեկավարին եւ Ազգային անվտանգության ծառայության տնօրենին հանձնարարվեց ապահովել օրենքով սահմանված մնացյալ երաշխիքների տրամադրումը պաշտոնաթող Հանրապետության Նախագահ Սերժ Սարգսյանին՝ իր դիմումի հիման վրա:
Որոշումն ուժի մեջ է կմտնի 2018 թվականի ապրիլի 9-ից:
Լուսինե ԲՈՒԴԱՂՅԱՆ
