Այսօր Երեւանի ընդհանուր իրավասության դատարանում «Սասնա ծռերի» գործով դատական նիստը դարձյալ չկայացավ, Կարո Եղնուկյանի ինքնազգացողությունը էլի վատ էր:
Երբ դատավոր Արտուշ Գաբրիելյանին հայտնեցին, որ Եղնուկյանը չի գալիս դատական նիստին մասնակցելու, նա արձագանքեց՝ եթե գա՝ ճնշումը կբարձրանա՞:
Դատավորն ասաց, որ առանց նրա մասնակցության, դատական նիստը չի կարող շարունակվել: Նա նաեւ հայտնեց, որ հանձնաժողովային դատական բժշկական փորձաքննություն իրականացնելու համար Եղնուկյանն այսօր պետք է Էրեբունի բժշկական կենտրոնում լինի՝ նեղ մասնագիտական կլինիկալաբորատոր եւ գործիքային հետազոտության իրականացման նպատակով:
Փաստաբան Տիգրան Հայրապետյանն ասաց, որ ինքը միջնորդություններ է ներկայացրել, որոնք կապված են այդ փորձաքննության անցկացման հետ: Դատավորն ասաց, որ այդ միջնորդությունները դեռեւս քննարկման առարկա չեն, դրանց կանդրադառնանք հետո: Հայրապետյանը պնդեց, որ միջնորդությունները քննարկվեն, դատավորը հակադարձեց՝ եթե անձն այստեղ չի, առանց իրեն միջնորդությունը ո՞նց քննարկենք: Հայրապետյանի խոսքով՝ «Փորձաքննության մասնակցելով հիմա, նա վտանգի է ենթարկում իր կյանքը: Իր կյանքին սպառնացող իրական վտանգ կա, պատասխանատվությունը ձեր վրա է ընկնելու»:
Դատավորն ասաց, որ հաջորդ դատական նիստերին կանդրադառնան միջնորդությանը:
Հայրապետյանն ասաց, որ ուշ կլինի: Դատավորը մնաց անդրդվելի՝ ասելով, որ երբեք ուշ չի լինի: Նիստը նշանակվեց հաջորդ հինգշաբթի, ժամը 11-ին:
Հռիփսիմե ՋԵԲԵՋՅԱՆ
