90 կմ երկարությամբ Մ6 Վանաձոր-Ալավերդի-Բագրատաշեն միջպետական ճանապարհի վերանորոգումը նախատեսված է իրականացնել երկու փուլով: Առաջին փուլում վերանորոգվում է Վանաձոր-Ալավերդի ճանապարհի 38,5 կմ երկարությամբ հատվածը, որն ընդգրկում է նաև միջպետական ճանապարհի երեք թունելներն ու կամուրջները:
2016թ. սեպտեմբերի 14-ից վերանորոգման նպատակով փակ էր միջպետական ավտոճանապարհի Վանաձոր-Ալավերդի հատվածը, ավտոտրանսպորտի երթեւեկությունը կատարվում էր շրջանցիկ, Ստեփանավանով ձգվող ճանապարհով: Անցած մեկուկես տարում 38.5 կմ երկարությամբ Վանաձոր-Ալավերդի ավտոճանապարհին մեծածավալ աշխատանքներ են կատարվել, թունելների երկարությունն ավելացվել է, դրանց ծածկն՝ ամրացվել, ճանապարհի ջրահեռացման են աշխատանքներ կատարվել եւ այլն: Սակայն այդ ճանապարհին դեռ շատ գործ կա, ճանապարհի զգալի մասն ասֆալտապատ չէ, ասֆալտապատումը հատվածաբար է կատարվել, ջրահեռացումն ավարտված չէ:
Ներկայումս Նոյեմբերյան-Վանաձոր եւ հակառակ ուղղությամբ երթուղային ավտոբուսները եւ միկրոավտոբուսները անցնում են Ալավերդի-Վանաձոր ճանապարհով, հաղթահարելով հողածածկ ուղին:
Ոսկան ՍԱՐԳՍՅԱՆ
