Զբոսաշրջային այս սեզոնին Հանրապետության հրապարակը վերածվել է «տուրերի» տոնավաճառի: Հենց հրապարակի մեջտեղում Գառնի-Գեղարդ-Տաթեւ, Սեւան-Հաղարծին պաստառները ավտոմեքենաներին փռած` տասնյակ անհատներ զբոսաշրջիկներին շրջայցեր են առաջարկում: Եթե գնի շուրջ համաձայնության են գալիս, պաստառը հավաքում են ու զբոսաշրջիկի հետ ճանապարհ ընկնում:
Հասկանալի է, որ գործազրկության բարձր մակարդակ ունեցող մեր երկրում (տղամարդկանց շրջանում՝ 18,1%, կանանց շրջանում` 17,8%) մարդիկ փորձում են գոնե տուրիզմի սեզոնից որոշ եկամուտներ ստանալ, բայց հրապարակը չէ այն վայրը, որտեղ պետք է այդ ծառայություններն առաջարկվեն: Հանրապետության հրապարակը մեր մայրաքաղաք Երեւանի սիրտն է. երկրի մասին պատմող գովազդային հոլովակներում զբոսաշրջիկներին հատուկ այն տեսնելու, ճարտարապետությամբ հիանալու ենք հրավիրում, բայց նրանք գալիս՝ թափթփված ու ասիական շուկա հիշեցնող իրավիճակի են ականատես լինում:
Կառավարությունը, քաղաքային իշխանությունները երկիրը, մայրաքաղաքը գովազդելու, դիզայնի վրա միլիոններ են ծախսում, բայց այսպիսի սկզբունքային հարցեր՝ անտեսում:
Լուսանկարները`
ԼՈՒՍԻՆԵ ԲՈՒԴԱՂՅԱՆԻ
«Առավոտ»
28.03.2018
