Արթուր Վանոյանի եւ Յուրի Տեփանոսյանի մարմինների վրա նաեւ բութ առարկայով հասցված վնասվածքներ են եղել

Ըստ փորձաքննության եզրակացության՝ այն պատճառվել է կենդանության ժամանակ՝ սուր ծայրով բութ առարկայով:

2016թ. ՊՊԾ գնդի գրավման ժամանակ զոհված Ոստիկանության գնդապետ Արթուր Վանոյանի վրա հրազենային վնասվածքից բացի եղել են մի քանի քերծվածքներ: Այս մասին պարզ դարձավ այսօր՝ ՊՊԾ գունդը գրաված «Սասնա ծռեր» խմբի անդամների՝ դատավոր Մեսրոպ Մակյանի վարույթում գտնվող գործով հերթական դատական նիստում: Ըստ դիակի դատաբժշկական փորձաքննության եզրակացության՝ այդ վնասվածքները հասցվել են բութ առարկայով, իսկ հրազենային վնասվածքի ստացումն անմիջականորեն կապվում է նրա մահվան փաստի հետ:

Իսկ Յուրի Տեփանոսյանի մարմնի վրա եւս, հրազենային վնասվածքից բացի, եղել է սալջարդ: Ըստ փորձաքննության եզրակացության՝ այն պատճառվել է կենդանության ժամանակ՝ սուր ծայրով բութ առարկայով:

Ոստիկան Գագիկ Մկրտչյանի մահվան պատճառն էլ հրազենային վնասվածքն է եղել: Հիշեցնենք, որ նրա սպանության մեջ մեղադրվում է Արմեն Բիլյանը: Մյուս երկու ոստիկանների սպանությունն էլ ամբաստանյալներից Սմբատ Բարսեղյանին է վերագրվում:

Լուիզա ՍՈՒՔԻԱՍՅԱՆ