«Հաշմանդամություն ունեցող անձանց իրավունքների պաշտպանության եւ սոցիալական ներառման մասին» օրենքի նախագծի խորհրդարանական լսումներն այսօր տեղի ունեցան ոչ թե խորհրդարանում, այլ՝ «Կոնգրես» հյուրանոցում։
«Ունիսոն» հ/կ-ի նախագահ Արմեն Ալավերդյանը նշեց օրենքի նախագծի որոշ, իր կարծիքով խնդրահարույց դրույթներին, որոնցից մեկը բժշկասոցիալական փորձաքննությանն է վերաբերում. «Ես դրան կատեգորիկ դեմ եմ, մենք ունենում ենք երկու մայր օրենք, ինչ կիսատ-պռատ, հին օրենքից մնացած է»:
Մանրամասն՝ տեսանյութում
Ալավերդյանի բարձրացրած խնդրին արձագանքեց ԱԺ առողջապահության եւ սոցիալական հարցերի մշտական հանձնաժողովի նախագահ Հակոբ Հակոբյանը. «Մենք ունենալու ենք առանձին օրենք՝ ինչպես ճանաչել հաշմանդամությունը»:
Ալավերդյանը նաեւ հիշեցրեց՝ մեր պետությունն ունի պարտավորություն ՄԱԿ-ի համապատասխան կոնվենցիայով՝ հաշմանդամություն ունեցող անձանց անկախ կյանքի ապահովման վերաբերյալ պահանջի կատարման, այդ թվում նրանց աջակցության նպատակով եւ անհրաժեշտության դեպքում անհատական ասիստենտներ տրամադրելու:
Աշխատանքի եւ սոցիալական հարցերի նախարարի տեղակալ Սմբատ Սաիյանն էլ պատասխանելով Ալավերդյանի հիշեցմանն, ասաց, որ նախարարության սկզբունքը հետեւյալն է՝ օրենքում չամրագրել դրույթներ, որոնք հետագայում ֆինանսական սահմանափակումների պատճառով հնարավոր չի լինելու իրականացնել:
Մանրամասն՝ տեսանյութում
Քննարկմանը մասնակից մեկ այլ հ/կ-ի ղեկավար էլ դիմելով փոխնախարարին, առաջարկեց օրենքով ամրագրել հաշմանդամության որոշակի խմբերի, ասենք՝ ոտքից զրկված անձին արտահերթ սպասարկելու իրավունք: Այս առաջարկին ի պատասխան՝ փոխնախարարն ասաց, որ չեն կարող նման բան անել, դա անհնար է. այստեղ պետք է գործի բարոյական նորմը. «Սա այն դեպքն է, որ դաշտը չկարգավորելը շատ ավելի արդյունավետ կարգավորում է»:
Մանրամասն՝ տեսանյութում
Նելլի ԲԱԲԱՅԱՆ
