ՀՅԴ Հայաստանի Գերագույն մարմնի ներկայացուցիչ Արսեն Համբարձումյանն այսօր լրագրողների հետ զրույցում անդրադարձավ նախագահ Սերժ Սարգսյանի՝ իր վարչապետի պաշտոնում առաջադրվելու վերաբերյալ մեկնաբանությանը, որում նաեւ ասվում է. «Մենք անցանք ապրիլյան պատերազմ, տեսանք մայրաքաղաքում զենքի ուժով հարցեր լուծելու պատրաստ մարդկանց գործողություններ, այսօր էլ տեսնում ենք ուժեր, որոնք, հաշվի չառնելով հնարավոր հետևանքները, պատրաստ են փողոցում խնդիրներ դնել, անկախ նրանից՝ այդ խնդիրները քաղաքագիտության և տրամաբանության շրջանակում են, թե՝ ոչ»:
«Զենքի ճանապարհով հարցեր լուծելն անընդունելի է: Կարծում եմ՝ նախագահը դա ի նկատի ուներ»,-ասաց Արսեն Համբարձումյանը:
Մեկնաբանելով «Սասնա ծռեր» անունը ստացած խմբի կողմից 2016թ. ՊՊԾ գնդի գրավումը՝ նա կրկին մատնանշեց. «Զենքի ճանապարհով հարցեր լուծելն արկածախնդրություն է, նման դեպքերը պետք է բացառվեն»:
Համբարձումյանի խոսքով՝ ՊՊԾ գնդի գրավումը բարոյահոգեբանական իմաստով վատ է անդրադարձել Հայաստանի համար. «Ապրիլյան դեպքերից հետո համախմբման ռեսուրսը կոտրվեց հուլիսյան դեպքերով»:
Լուիզա ՍՈՒՔԻԱՍՅԱՆ
