ՀՀ կառավարությանն առընթեր պետական գույքի կառավարման վարչության պետ Արման Սահակյանն էլ բոլոր ՀՀԿ-ականների նման նպատակահարմար է գտնում, որ Սերժ Սարգսյանը դառնա ՀՀ վարչապետ: Այսօր Եռաբլուրում լրագրողների հետ զրույցում Արման Սահակյանը դժգոհեց, որ լրագրողները չեն նկատում ՀՀԿ-ի եւ Սերժ Սարգսյանի արած լավ գործերն ու ձեռքբերումները: Լրագրողները հիշեցրել էին ՀՀԿ-ի ընդդիմախոսների կարծիքները, որ իր կառավարման տասը տարիների ընթացքում Սերժ Սարգսյանը միայն ձախողել է:
Իբրեւ հաջողության օրինակ նշում է սահմանների անառիկությունը: Լրագրողները հիշեցրին 2016-ի ապրիլյան քառօրյա պատերազմը, 800 հեկտար տարածքի կորուստը: Ասաց` 800 հեկտարի մասին չի խոսում ու չի կիսում կարծիքը, որ ապրիլյան պատերազմը ցույց տվեց, որ մեր սահմաններն էլ անառիկ չեն:
Aravo.am-ի հարցին`օլիգարխիկ տնտեսական համակարգը նպաստո՞ւմ է, որ սահմաններն անառիկ մնան, Արման Սահակյանը հակադարձեց կառավարության ներկայացրած 7,7 տոկոս տնտեսական աճով ու խոստացավ, որ եթե համաշխարհային վայրիվերումներ չլինեն, 2019-ին ՀՀ քաղաքացին կզգա աճի արդյունքները: Նա չի կարծում, որ Հայաստանում տնտեսությունն օլիգարխիայի ձեռքում է. «Մի բան պետք է ի վերջո հասկանանք. ամբողջ աշխարհում ընդունված բան է`երկիրը պահողը, դրանք հարուստներն են, որովհետեւ նրանք են աշխատատեղեր ստեղծում»:
Արման Սահակյանը չի կիսում տեսակետը, որ հարուստները թույլ չեն տալիս տնտեսական մրցակցություն, ինչն էլ հանգեցնում է աղքատության եւ արտագաղթի. «Դուք ձեր կարծիքն ունեք, ես իմ կարծիքն արտահայտեցի»:
Մանրամասները`տեսանյութում
Նելլի ԳՐԻԳՈՐՅԱՆ
