«ՀՅԴ-ն քաղաքական զարգացումներն անձերով չի պայմանավորում: Վարչապետի թեկնածուի հարցի արծարծումը կեղծ քաղաքական օրակարգ է: Սահմանադրությամբ այդ հարցը վերապահված է քաղաքական մեծամասնությանը: ՀՀԿ-ՀՅԴ կոալիցիոն հուշագրով՝ վարչապետի թեկնածուի առաջադրման իրավունքը վերապահված է ՀՀԿ-ին»,- լրագրողների հետ զրույցում այսօր ասաց ՀՅԴ Հայաստանի Գերագույն մարմնի ներկայացուցիչ Արսեն Համբարձումյանը՝ պատասխանելով հարցին, թե՝ «ՀՀԿ-ն չի թաքցնում, որ իր վարչապետի թեկնածուն Սերժ Սարգսյանն է, ՀՅԴ-ի համար դա ընդունելի՞ է»:
Համբարձումյանն ընդգծեց՝ որպես կոալիցիայի անդամ՝ իրենք հարգանքով կվերաբերվեն իրենց քաղաքական գործընկերոջ որոշմանը: «Եթե Սերժ Սարգսյան քաղաքական գործչի մասին չունենայինք դրական մոտեցում, կոալիցիայի մաս չէինք կազմի»,-վստահեցրեց Արսեն Համբարձումյանը:
«Ձեզ համար է՞լ է Սերժ Սարգսյանն անփոխարինելի» հարցին էլ այսպես արձագանքեց. «Դա փիլիսոփայական հարցադրում է»: Դիտարկմանն ի պատասխան, թե՝ «ըստ ՀՀԿ-ականների՝ Սերժ Սարգսյանն, օրինակ, անփոխարինելի է Արցախի հարցի բանակցային սեղանի շուրջ. Կարեն Կարապետյանը չի՞ կարող բանակցել», Արսեն Համբարձումյանն ասաց. «Պետք չի բացառել, յուրաքանչյուրն էլ կարող է նստել բանակցային սեղանի շուրջ: Այլ է հարցը, թե արդյունքն ինչպիսին կլինի»:
Լուիզա ՍՈՒՔԻԱՍՅԱՆ
