Մարտի 24-28-ը Ժնևում Միջխորհրդարանական միության 138-րդ վեհաժողովի շրջանակներում կայացած առողջապահության խորհրդատվական խմբի աշխատանքների ընթացքում ՀՀ ԱԺ պատգամավոր Կարեն Ավագյանը, մասնակցելով պատանիների առողջության թեմայի վերաբերյալ քննարկումներին, ներկայացրել է այդ ուղղությամբ Հայաստանում իրականացվող քաղաքականությունն ու փորձը։ Այս համատեքստում Կարեն Ավագյանն անդրադարձել է ՀՀ դպրոցներում ներդրված առողջ ապրելակերպի դասընթացին, որի շրջանակներում պատանիներին տրամադրվում են գիտելիքներ, տեղեկություններ առողջ ապրելակերպի տարբեր թեմաների վերաբերյալ, այդ թվում նաև՝ ՄԻԱՎ/ՁԻԱՀ-ի, ծխելու վնասակար հետևանքների, ֆիզիկական ակտիվության անհրաժեշտության և բազմաթիվ այլ հարցերի վերաբերյալ։ Խոսվել է նաև այն մասին, որ Հայաստանը էլիմինացրել է մորից երեխային ՄԻԱՎ-ի փոխանցումը, ինչին հասել են համապարփակ առողջապահական ծածկույթ ապահովելով հղիների և երեխաների համար։ Ընդ որում, այս հարցում մեծ է եղել խորհրդարանի դերը, քանի որ օրենսդիր մարմինն աշխատում է ոչ միայն համապատասխան օրենքներ ընդունելով, որոնք դեռահասներին թույլ են տալիս մեկուսի, գաղտնի, բարյացակամ առողջապահական ծառայություններ ստանալ, այլև ավելացրել է հղիներին և երեխաներին ուղղված առողջապահական ծառայությունների պետական ֆինանսավորումը։
Կարեն Ավագյանի կողմից հատուկ շեշտվել է այն փաստը, որ ՀՀ խորհրդարանը ներգրավված է առողջ ապրելակերպի դասընթացի և՜ գնահատման, և՜ արդյունքների քննարկման գործընթացում։ ՀՀ օրենսդիր մարմինը պարբերաբար իրականացնում է նաև խորհրդարանական լսումներ պատանիների առողջության հարցերին առնչվող, որտեղ ներկայացվում են դեռահասների առողջության և վարքագծի հետ կապված հետազոտությունների արդյունքները և այն հարցերը, որոնց լուծման համար խորհրդարանը կարող է համապատասխան միջոցներ ձեռնարկել։
Տարբեր երկրների պատվիրակներ հետաքրքրված էին հայաստանյան փորձով, մեր երկրում առողջ ապրելակերպի քարոզման ոլորտում իրականացվող որոշ տարրեր իրենց երակներում տեղայնացնելու հեռանկարով։
ՀՀԿ երիտասարդական կազմակերպություն
