ՀՅԴ Հայաստանի Գերագույն Մարմնի ներկայացուցիչ Արսեն Համբարձումյանն այսօր լրագրողների հետ զրույցում անդրադարձավ հարցին, թե արդյոք Աղվան Վարդանյանն առաջիկայում՝ ապրիլին ձեւավորվող նոր կառավարությունում պաշտոն է ստանալու եւ դա է պատճառը, որ նա, ինչպես եւ Արմեն Ռուստամյանը, չկան ԳՄ նորընտիր կազմում:
«Այդ փաստով չէ պայմանավորված, նման օրակարգ մենք չունենք: Կառավարության անդամ եւ ԱԺ պատգամավոր մեր գործընկերները բավականին բազմազբաղ են: Հետեւաբար, որոշել ենք, որ առաջիկա երկու տարում ԳՄ աշխատանքների կազմակերպման նման դերաբաշխում կատարել եւ ԳՄ-ում երիտասարդ կադրերի ներառել»,-հայտարարեց Արսեն Համբարձումյանը:
Մեկնաբանելով մամուլում առկա տեղեկությունները, թե Աղվան Վարդանյանն, այնուամենայնիվ, պաշտոն կունենա, նա ասաց. «Հեշտությամբ եք մարդկանց պաշտոնի նշանակում, հետո ազատում: Կրկնում եմ՝ չկա նման օրակարգ»:
Արսեն Համբարձումյանի խոսքով՝ ՀՅԴ ԳՄ նոր կազմում Արմեն Ռուստամյանի եւ Աղվան Վարդանյանի չլինելը պայմանավորված չէ պաշտոններ ստանալու մասին խոսակցություններով: Հարցին՝ «գո՞հ եք նրանց աշխատանքից», Համբարձումյանը պատասխանեց. «Գնահատման նման չափորոշիչներ չկան, պետք չէ սա դժգոհության հետ կապել»:
Լուիզա ՍՈՒՔԻԱՍՅԱՆ
