ՀՀ մշակույթի նախարարության ֆեյսբուքյան էջում մարտի 19-ին զետեղվել , այժմ էլ այնտեղ առկա է «Սան Ռեմոյի պատանեկան մրցույթին Հայաստանից կմասնակցեն Համլետ Բադալյանը ( Դիլիջան) եւ Գոռ Հարությունյանը ( Իջեւան )» վերնագրով հոդված, ուր նշված է. « Հայաստանը միացել է SanremoJunior մրցույթին եւ անցկացրել «ՍանՌեմո» երգի միջազգային 9-րդ մրցույթի հայաստանյան ընտրությունները: Մարտի 14-ին Երևանի Առնո Բաբաջանյանի անվան համերգասրահում տեղի ունեցավ մրցույթի հայաստանյան եզրափակիչ փուլը, որին մասնակցեցին Գյումրիում եւ Երևանում կիսաեզրափակիչ փուլերին մասնակցած լավագույն կատարողները: Ժյուրին հաղթող ճանաչեց Դիլիջանի արվեստի պետական քոլեջին կից երաժշտական դպրոցի սան Համլետ Բադալյանին (դասատու` Վարազդատ Հովհաննիսյան, տնօրեն` Հասմիկ Մկրտումյան) եւ Իջևանի միջնակարգ երաժշտական դպրոցի սան Գոռ Հարությունյանին (դասատու` Ռուզան Մատինյան , տնօրեն` Աիդա Սարգսյան) : Մասնակիցներն Իտալիայի Սան Ռեմո քաղաքում Հայաստանի դրոշի ներքո ելույթ կունենան ապրիլի 19-ին: SanremoJunior մրցույթն անցկացվում է 2010 թ.-ից, Սան Ռեմո քաղաքի «Արիստոն» համերգասրահում՝ բարձրակարգ նվագախմբի կենդանի նվագակցությամբ: Այս տարիների ընթացքում մրցույթի ընտրական փուլի անցկացման իրավունքը գնել են աշխարհի մի շարք պետություններ: Այս տարի այդ բացառիկ հնարավորությունն ընձեռվեց Հայաստանին` շնորհիվ Երեւանի պետական կոնսերվատորիայի Գյումրու մասնաճյուղի տնօրեն, «Վերածնունդ» միջազգային մրցույթ-փառատոնի հիմնադիր, Հայաստանի մշակույթի վաստակավոր գործիչ, դոկտոր, պրոֆեսոր Կարինե Ավդալյանի հետեւողական գործունեության»:
Մարտի 24-ին Կարինե Ավդալյանը էլեկտրոնային նամակ է ուղարկել Իջեւանի քաղաքապետ Վարդան Ղալումյանին, ուր հայտնել է. « Գյումրիում եւ Երեւանում կիսաեզրափակիչ փուլերում աչքի ընկած լավագույն կատարողներից մարտի 14-ին Երեւանում կայացած եզրափակիչ փուլի արդյունքներով հայաստանյան ընտրական փուլի ժյուրին,որի կազմում էին ՀՀ երաժշտարվեստի 9 ճանաչված գործիչներ, հաղթող ճանաչեց եւ Սանրեմո երգի միջազգային IX մրցույթին մասնակցելու միակ ուղեգիրը շնորհեց Դիլիջանի արվեստի պետական քոլեջին կից երաժշտական դպրոցի սան Համլետ Բադալյանին, որւ հավաքել էր 60 միավոր: Հայաստանի ժյուրիի կողմից որոշում ընդունվեց՝ նկատի ունենալով ՀՀ առաջին անգամ մասնակցությունը Սան Ռեմո երգի միջազգային մրցույթին, խնդրել մրցույթի կազմկոմիտեին բացառության կարգով թույլ տալ Հայաստանից մասնակցելու երկու մասնակիցների: Որպես երկրորդ մասնակից ժյուրիի կողմից ընտրվեց սահմանամերձ Տավուշի մարզի Իջեւան քաղաքի միջնակարգ երաժշտական դպրոցի սան Գոռ Հարությունյանի թեկնածությունը, որը հավաքել էր շատ ավելի քիչ`42 միավոր: Ցավոք, մեր ժյուրիի առաջարկությունը իտալացի գործընկերների կողմից մերժվեց: (Կից ներկայացվում է մեր խնդրանքի եւ իտալացիների մերժման նամակագրությունը)»:
Սան Ռեմո մեկնելու նպատակով եւ այնտեղ կեցության ծախսերի համար Գոռ Հարությունյանի ծնողները կարողացել են հապշտապ գումար ճարել՝ 350 եւ 120 եվրո , այդ գումարները մուծել, 11-ամյա Գոռի Իտալիա մեկնելու համար անձնագիր ստանալ: Գոռի մայրը`Լարիսա Ծովանյանը, մեզ հայտնեց, որ տարբեր լրատվամիջոցներով հաղորդվել է, որ մրցույթի 2 հաղթողները հավասար միավորներով են հաղթող ճանաչվել: Նա համաձայն չէ Կարինե Ավդալյանի այն առաջարկին,որ իրենց հետ վճարվեն Գոռի Իտալիա մեկնելու համար մուծված գումարները, Գոռը մեկնելով Սան Ռեմո, այնտեղ ելույթ չունենա, միայն մասնակցի մաստեր կլասի՝ երգարվեստի վարպետության դասերի: Նրան հայտնեցինք Կարինե Ավդալյանի խոսքերը, թե Գոռը մյուս հաղթողից մրցույթում վատ է հանդես եկել, տիկին Լարիսան ասաց, որ Գոռն անցյալ տարի հաղթող է ճանաչվել վերոհիշյալ «Վերածնունդ» երգի մրցույթում:
Կարինե Ավդալյանը մեզ ասաց,որ ինքը կարողացել է հովանավորների միջոցով գտնել եւ 15 հազար եվրո վճարել «Սան Ռեմո» երգի միջազգային մրցույթին Հայաստանի մասնակցության իրավունքի համար: Նա հայտնեց, որ Գոռը սիրուն տեսք ունի, ի վերուստ տրված լավ ձայն, սակայն երգի ժամանակ ճիշտ շնչառության, լավ մասնագետների հետ մշտապես աշխատելու եւ այլ խնդիրներ կան: Հավելեց, որ ինքը շատ է հավանել Գոռին եւ ցանկացել է , որ նա, որպես սահմանամերձ մարզից երեխա, Սան-Ռեմոյի մրցույթին մասնակցի: Կ.Ավդալյանն ասաց, որ ինքը նամակ է ուղարկել միջազգային մրցույթի կազմակերպիչներին, որպեսզի բացառության կարգով թույլատրեն Հայաստանից 2-րդ մասնակցի մասնակցությունը: Իտալիայից պատասխանը չի ստացվել, հաջորդ օրը ստացված նամակում կազմկոմիտեն հայտնել է, որ իրենք ներկա չեն եղել հայաստանյան փուլին, Հայաստանն էլ առաջին անգամ է մասնակցելու մրցույթին, Հայաստանից երկրորդ մասնակցի թույլ չի տրվում մասնակցելու: Տիկին Ավդալյանն ասաց, որ հավանելով Գոռին՝ նրա ձայնագրությունը կատարել է իր անձնական միջոցներով, Իտալիայում մաստեր կլասը օգտակար կլիներ նրա առաջընթացի համար: Նա հայտնեց, որ այդ օրերին իր որդու առողջական վիճակի վատացման պատճառով հուզված վիճակում է եղել, սակայն զբաղվել է մրցույթին Գոռի մասնակցության խնդրով;
Դրանից հետո մեզ զանգահարեց մրցույթի ժյուրիի անդամներից ՀՀ մշակույթի վաստակավոր գործիչ, Հայաստանի ժուռնալիստների միության վարչության անդամ Զառա Արամյանը: Նա ասաց, որ իրենք շատ լավ են վերաբերել Գոռ Հարությունյանին, մրցույթի մասնակիցներին , նրանց ծնողներին գրավոր ծանուցել են դրանց պայմանների մասին, նրանք կարող էին դրանց ծանոթանալ: Նաեւ հայտնեց, մեր կողմից վերոհիշյալ թեմայով նյութ հրապարակելուց հետո ինքն էլ է այդ մասին հոդված գրելու:
Ոսկան ՍԱՐԳՍՅԱՆ
Լուսանկարը՝ ՀՀ մշակույթի նախարարության ֆեյսբուքյան էջից
Հոդվածի իմա՞ստը….