Ռուսաստանի նախագահ Վլադիմիր Պուտինը մարտի 28-ը երկրում համազգային սուգ է հայտարարել՝ կապված Կեմերովո քաղաքում «Զիմնյայա վիշնյա» առևտրի կենտրոնում տեղի ունեցած հրդեհի հետ: Այս մասին հաղորդում է BBC-ն՝ վկայակոչելով Կրեմլի մամուլի ծառայությունը:
Պաշտոնական տվյալներով՝ հրդեհի զոհ է դարձել 64 մարդ, մեծ մասը՝ երեխաներ: Տեղի բնակիչներից շատերը կասկածի տակ են դնում պաշտոնական տվյալները և փորձում են սեփական ուժերով հաշվել զոհերի թիվը:
Այսօր առավոտյան Կեմերովոյի մարզային վարչության շենքի մոտ տարերային ցույց էր սկսվել, որի մասնակիցները կարողացան համոզել տեղական իշխանություններին իրենց թույլ տալ մտնել դիահերձարան:
Վաղ առավոտյան Կեմերովո էր ժամանել երկրի նախագահ Վլադիմիր Պուտինը, որն այնտեղ տեղի ունեցած խորհրդակցության ժամանակ հրդեհը համարել է փնթիության և անփութության հետևանք:
Պատրաստեց՝ Վիկտորյա ԱՆԴՐԵԱՍՅԱՆԸ
