Երևանի մնջախաղի պետական թատրոնը» 2017-ը սկսեց հաճելի անակնկալով. գեղարվեստական ղեկավար Ժիրայր Դադասյանը նախարար Ամիրյանի ձեռքից ստացավ թատրոնի շենքի ՝ երկար սպասված խորհրդանշական բանալին: Ամբողջ տարվա ընթացքում մնջախաղցիներն ակտիվորեն ներգրավված են եղել Գևորգ Քոչարի 21 հասցեում գտնվող շենքի նախագծային աշխատանքներում, որի արդյունքը՝ Մնջախաղի թատրոնի նախագիծը, վերջերս ներկայացվեց հանրությանը: Թատրոնի կյանքն, ինչպես միշտ, 2017-ին ևս հագեցած է եղել հյուրախաղերով, փառատոններով: Թատրոնն ամենուր բարձր մակարդակով ու մեծ հաջողությամբ է ներկայացրել հայկական մնջախաղի հարուստ ավանդույթները:
«Դրսում մեր արվեստը ներկայացնելն, իհարկե, հրաշալի է, բայց պետք է փորձեք նախ և առաջ Հայաստանում հանդիսատեսին հասանելի դարձնել այն արվեստը, որը ստեղծում եք»,-ասաց նախարարը:
Սեփական տանիքից դեռևս զուրկ Մնջախաղի թատրոնը վարձակալությամբ շաբաթը մեկ օր խաղում է Պատանի հանդիսատեսի թատրոնի բեմում: Նախարարը հորդորեց ավելացնել ներկայացումների քանակը ՝ օգտվելով ոչ միայն այդ թատրոնի բեմից:
Տարեկան խաղացանկի հստակ պլանավորման պահանջի մասին նախարարը հիշեցրեց թե′ Մնջախաղի, թե′ «Երևանի խամաճիկների պետական թատրոնի» ներկայացուցիչներին:
«Միասնական տոմսային համակարգը, որը նախատեսում ենք ներդնել շուրջ մեկ ամսից, պահանջում է խաղացանկի հստակ պլանավորում: Հանդիսատեսը պետք է հնարավորություն ունենա ընտրելու՝ ե՞րբ և կոնկրետ ո՞ր ներկայացումն է ցանկանում դիտել: Պետք է հարգել հանդիսատեսի այս իրավունքը»,-ասաց նախարարը՝ մեկ անգամ ևս ընդգծելով, որ պահանջը պարտադիր է նախարարության ենթակայությամբ գործող թատերահամերգային բոլոր կազմակերպությունների համար:
Ինչ վերաբերում է Խամաճիկների թատրոնի 2017-ի ֆինանսական ցուցանիշներին.
Թատրոնը 2017-ին ստացել է մոտ 60 միլիոն դրամի սուբսիդիա և նույնքան եկամուտ: Արտաբյուջեն պլանավորել է շուրջ 17 միլիոն դրամ, փաստացի եկամուտը կազմել է 16 միլիոն 479 հազար դրամ:
Խամաճիկների թատրոնի հարևանությամբ առաջիկայում կգործի «Երևանյան տրամվայ» շարժական բեմը, որտեղ պարբերաբար կներկայացվեն փոքրիկ բեմադրություններ: Նորամուծությունն, ամենայն հավանականությամբ, կնպաստի վերոնշյալ ցուցանիշների բարելավմանը:
Ալիսա Գևորգյան
Լուսանկարները՝ Վահրամ Մոսինյանի
