Մարտի 27-ի առավոտյան Ռուսաստանի Կեմերովո քաղաքում տարերային ցույց է տեղի ունեցել մարզային վարչության շենքի դիմաց՝ կապված «Զիմնյայա վիշնյա» առևտրի կենտրոնում 64 մարդու կյանք խլած հրդեհի հետ:
Ցուցարարներն իշխանություններից պահանջել են ճշմարտությունն ասել հրդեհի մասին. շատերը չեն հավատում հրդեհի զոհերի մասին պաշտոնական տվյալներին, մյուսները դժգոհություն են հայտնում, որ հրդեհի մարման աշխատանքներին քիչ թվով փրկարարներ են մասնակցել:
Երբ հավաքվածների մոտ դուրս է եկել փոխնահանգապետ Սերգեյ Ցիվիլյովը, ամբոխը նրան դիմավորել է «Հրաժարական», «Ճիշտը», «Մարդասպաններ» բացականչություններով: Նրանք նաև պահանջել են, որպեսզի իրենց մոտ դուրս գա երկրի նախագահ Վլադիմիր Պուտինը, որը մարտի 27-ին ժամանել է Կեմերովո: «Ինչու՞ է թագավորն ամբոխի մեջ: Մենք նրան չենք ընտրել»,- վանկարկել են ցուցարարները:
Ռուսաստանի նախագահ Վլադիմիր Պուտինը Կեմերովոյում տեղի ունեցած խորհրդակցության ժամանակ 64 մարդու կյանք խլած հրդեհն անվանել է անփութության ու փնթիության հետևանք:
«Ի՞նչ է մեզ մոտ կատարվում, մեզ մոտ ռազմական գործողություններ չեն, ոչ էլ հանքահորում մեթանի հանկարծակի արտանետում է եղել: Մարդիկ եկել են հանգստանալու, երեխաները: Մենք խոսում ենք ժողովրդագրության մասին և կորցնում ենք այսքան մարդ, ինչի՞ պատճառով: Հանցավոր անփութության, փնթիության»,- ասել է նա:
Պուտինը հանձնարարել է Քննչական կոմիտեի ղեկավար Ալեքսանդր Բաստիրկինին իրավական գնահատական տալ ողբերգության մեջ մեղավոր պաշտոնատար անձանց գործողություններին:
Պատրաստեց՝ Վիկտորյա ԱՆԴՐԵԱՍՅԱՆԸ
