Մարտի 26-ին ՀՀ սփյուռքի նախարար Հրանուշ Հակոբյանն ընդունեց Արգենտինայի Հանրապետության հայկական հաստատություններ (ԱՀՀՀ) կազմակերպության նախագահ, ՀՅԴ Հարավային Ամերիկայի Հայ Դատի հանձնախմբի ներկայացուցիչ Խաչիկ Տեր-Ղուկասյանին և ՀԲԸՄ Բուենոս Այրեսի մասնաճյուղի պատվո նախագահ Ռուբեն Քեշիշյանին:
Ողջունելով հյուրերին՝ նախարարը կարևորեց ազգային գործիչների՝ Արգենտինայի հայ համայնքի պահպանմանն ու Հայաստան-Սփյուռք կապերի ամրապնդմանն ուղղված հայանպաստ գործունեությունը, պատշաճ ուշադրությունը լեզվի և ինքնության պահպանության հարցերին:
Խաչիկ Տեր-Ղուկասյանը ներկայացրեց մեկ տարի առաջ Արգենտինայի հայ համայնքի ութ կազմակերպությունների նախաձեռնությամբ ստեղծված ԱՀՀՀ կառույցի իրականացրած աշխատանքները, խոսեց առաջիկա անելիքների ու ծրագրերի մասին:
Քննարկվեցին Արգենտինայում 2018թ. Հայաստանի Հանրապետության հռչակման և Մայիսյան հերոսամարտերի 100, Երևանի 2800, ՀՀ սփյուռքի նախարարության 10 ամյակների հոբելյանական միջոցառումների կազմակերպման հարցեր:
Արգենտինայի Հանրապետության հայկական հաստատություններ (ԱՀՀՀ) կազմակերպության նախագահը պատրաստակամություն հայտնեց ակտիվացնել համագործակցությունը նախարարության հետ, հոբելյանական օրերին մշակութային միջոցառումներ, ցուցահանդեսներ, ֆիլմերի ցուցադրություններ, ֆլեշմոբեր կազմակերպել:
ՀՀ Սփյուռքի նախարարություն
